Չինաստանն աշխարհում առաջինը գործարկել է 10G ցանցը
ԵՐԵՎԱՆ, 21 ապրիլի․/ԱՌԿԱ/․ Huawei ընկերությունը՝ համագործակցելով China Unicom-ի հետ, գործարկել է առաջին 10G լայնաշերտ ցանցը Չինաստանի Հեբեյ նահանգի Սյունան նոր շրջանում, որը տեղակայված է Պեկինի շուրջ։ Այս մասին գրում է ՌԲԿ-ն՝ հղում անելով Mydrivers-ին։
«Huawei-ն և China Unicom-ը միավորել են ուժերը՝ Սյունանի շրջանում գործարկելու առաջին 10G լայնաշերտ ցանցը։ 10G լայնաշերտ կապի ներդրումը հիմնված է աշխարհում առաջին 50G PON լուծման վրա», — նշվում է հոդվածում։
Հոդվածում նշվում է նաև, որ ներբեռնման փաստացի արագությունը հասել է 9834 Մբիթ/վրկ-ի, իսկ վերբեռնման արագությունը՝ 1008 Մբիթ/վրկ-ի։ Ուշացումը կայուն է՝ ընդամենը 3 միլիվայրկյան, ինչը զգալիորեն գերազանցում է ներկայիս տնային լայնաշերտ ինտերնետի ստանդարտները։
10G տեխնոլոգիայի կիրառումը հիմք է ստեղծում բարձր թողունակություն պահանջող հավելվածների զարգացման համար, ինչպիսիք են 8K տեսանյութերը, ամպային պահեստները, վիրտուալ իրականությունը։
2025 թվականի հունվարին Չինաստանում գործարկվել է 4.25 միլիոն 5G բազային կայան՝ ավելի շատ, քան որևէ այլ երկրում։