Առցանց խաղերն ու երեխաների անվտանգությունը․ Կիբեռոստիկանությունը 4 կարևոր քայլ է ներկայացրել ծնողների համար

ԵՐԵՎԱՆ, 15 օգոստոսի. /ԱՌԿԱ/․ ՀՀ ՆԳՆ Կիբեռոստիկանությունը հանդես է եկել հայտարարությամբ՝ ծնողներին կոչ անելով ուշադիր լինել առցանց խաղերում երեխաների անվտանգության նկատմամբ։

Իրավապահ մարմինների փոխանցմամբ՝ ժամանակակից խաղերը հաճախ վերածվում են հաղորդակցման հարթակների, որտեղ երեխաները կարող են ենթարկվել կիբեռբուլինգի (առցանց հետապնդման ու ծաղրի), հոգեբանական ճնշումների և անձնական տվյալների արտահոսքի։ Վերջիններս, անծանոթներին վստահելով, փոխանցում են լուսանկարներ ու հեռախոսահամարներ, որոնք հետագայում տարածվում են սոցիալական ցանցերում (օրինակ՝ Telegram-ի խմբերում)՝ հասցնելով ուժեղ սթրեսի, ագրեսիայի կամ ինքնավնասման մտքերի։

Կիբեռոստիկանությունը հորդորում է ծնողներին․

• Բացատրել երեխային, որ առցանց խաղընկերն իրական ընկեր չէ, և արգելվում է անծանոթներին ուղարկել անձնական տվյալներ կամ լուսանկարներ։
• Ստուգել խաղերի և մեսենջերների գաղտնիության կարգավորումները (Privacy Settings)՝ սահմանափակելով անծանոթների նամակագրությունը։
• Վստահեցնել երեխային, որ սպառնալիքի կամ ծաղրի դեպքում նա կարող է դիմել ծնողին և չի պատժվի։
• Ծաղրի կամ սպառնալիքի դեպքում լուսանկարել (Screenshot) ողջ նամակագրությունը, արգելափակել ուղարկողին և չմտնել փոխադարձ վեճի մեջ։

Կիբեռբուլինգի կամ առցանց հարձակման ենթարկվելու դեպքում Կիբեռոստիկանությունը հորդորում է անհապաղ դիմել իրավապահ մարմիններին։