Firebird-ը և Ղազախստանի կառավարությունը ստորագրել են ռազմավարական համաձայնագրեր՝ երկրում AI ենթակառուցվածքների զարգացման նպատակով
ԵՐԵՎԱՆ, 15 հունիսի․/ԱՌԿԱ/․ Աստանայում Firebird Inc. ընկերությունը և Ղազախստանի կառավարությունը ստորագրել են ռազմավարական համագործակցության համաձայնագրեր՝ երկրում արհեստական բանականության (AI) ազգային ենթակառուցվածքների, առաջադեմ հաշվողական կարողությունների և թվային էկոհամակարգի զարգացման նպատակով։
Փաստաթղթերի ստորագրումը տեղի է ունեցել Ղազախստանի վարչապետ Օլժաս Բեկտենովի, NVIDIA-ի փոխնախագահ Ռև Լեբարեդյանի, Firebird-ի համահիմնադիրներ Ռազմիկ Հովակիմյանի ու Ալեքսանդր Եսայանի, ինչպես նաև բարձրաստիճան պաշտոնյաների մասնակցությամբ։
Այս գործընթացին նախորդել էր ընթացիկ տարվա ապրիլին Ղազախստանի նախագահ Կասիմ-Ժոմարտ Տոկաևի և NVIDIA-ի ու Firebird-ի ներկայացուցիչների հանդիպումը։
Firebird-ի համահիմնադիր Ռազմիկ Հովակիմյանի խոսքով, այն երկրները, որոնք այսօր ներդրումներ են կատարում առաջադեմ AI հաշվարկային կարողությունների, տաղանդների զարգացման և նորարարական էկոհամակարգերի ձևավորման մեջ, վաղը ձևավորելու են համաշխարհային տնտեսության հնարավորությունները։
«Firebird-ը համատեղում է խոշոր ենթակառուցվածքային նախագծերի իրականացման ապացուցված փորձը, ԱՄՆ առաջատար տեխնոլոգիական լուծումները, գլոբալ AI էկոհամակարգի առանցքային գործընկերների հետ սերտ համագործակցությունը և լայնածավալ AI ենթակառուցվածքային նախագծերն անվտանգ և բացառիկ արագությամբ իրականացնելու կարողությունը։ Մենք հպարտ ենք աջակցելու Ղազախստանի տեսլականին և պատրաստ ենք նպաստելու երկրի երկարաժամկետ ազգային AI կարողությունների ձևավորմանը»,-նշել է Ռազմիկ Հովակիմյանը։
Համագործակցությունն ուղղված է ամպային տեխնոլոգիաների, գիտահետազոտական նախաձեռնությունների զարգացմանը և Ղազախստանը Կենտրոնական Եվրասիայի տեխնոլոգիական կենտրոն դարձնելուն։
Firebird-ի համահիմնադիր Ռազմիկ Հովակիմյանը և Ղազախստանի թվային զարգացման նախարար Ժասլան Մադիևը կարևորել են AI ոլորտում սեփական ազգային կարողությունների ու ամբողջական էկոհամակարգի ձևավորումը գլոբալ տնտեսության մեջ մրցունակ լինելու համար։
Նշվում է նաև, որ Firebird-ն այժմ ավարտին է հասցնում Հայաստանում իր առաջատար AI Factory նախագծի առաջին փուլը, որի գործարկումը նախատեսված է 2026 թվականի հուլիսին։ Ըստ ընդլայնման ռազմավարության՝ մինչև 2027 թվականի ավարտը հայաստանյան կենտրոնը նախատեսվում է հագեցնել ավելի քան 100,000 NVIDIA Blackwell և Vera Rubin GPU-ներով՝ այն դարձնելով աշխարհի խոշորագույն AI հաշվողական հարթակներից մեկը։
Firebird-ի մասին
Firebird Inc.-ը ԱՄՆ-ում գործող արհեստական բանականության ամպային և ենթակառուցվածքային ընկերություն է, որը նախատեսված է անվտանգ, մասշտաբային և համաշխարհային հասանելիություն ունեցող գրաֆիկական պրոցեսորներով ենթակառուցվածք ապահովելու համար։ Ընկերության առաքելությունն է ժողովրդավարացնել առաջադեմ արհեստական բանականության հաշվարկների հասանելիությունը՝ հնարավորություն տալով նորարարություններ իրականացնել հետազոտությունների և ձեռնարկությունների շրջանում՝ ինչպես մասնավոր, այնպես էլ պետական հատվածներում։