TahawulTech․ ՀՀ–ում ԱԲ–գործարանի գործարկումը դարձավ Firebird-ի գլոբալ ենթակառուցվածքային հարթակի մեկնարկը

ԵՐԵՎԱՆ, 10 օգոստոսի․/ԱՌԿԱ/․ Հրազդանում Firebird ԱԲ–գործարանի գործարկումը դարձավ ընկերության գլոբալ ենթակառուցվածքային հարթակի օպերացիոն մեկնարկը, որի հզորությունը նախատեսվում է մինչև 2028 թվականի վերջը հասցնել շուրջ 2 ԳՎտ-ի: Այս մասին գրում է TahawulTech միջազգային տեխնոլոգիական հրատարակությունը:

TahawulTech-ը Հայաստանում գործարկված օբյեկտն անվանում է ԱՊՀ տարածաշրջանում խոշորագույն ԱԲ–գործարանը և այն դիտարկում է որպես հիմք՝ բարձր արտադրողականությամբ հաշվարկների, արհեստական բանականության հետազոտությունների և տեխնոլոգիական նորարարությունների ոլորտում երկրի դերի ուժեղացման համար:

Հարթակը կառուցվել է NVIDIA DSX AI Factory ռեֆերենսային ճարտարապետության և Dell PowerEdge սերվերների օգտագործմամբ: Այն հաշվարկային ռեսուրսներ է տրամադրում մշակողներին, ստարտափներին, ընկերություններին, համալսարաններին և պետական կազմակերպություններին՝ երկրի ներսում ԱԲ-մոդելների ուսուցման, լրացուցիչ ուսուցման և օգտագործման համար:

Firebird-ը նախատեսում է մինչև 2027 թվականի վերջը հայկական ԱԲ–գործարանը մասշտաբավորել մինչև ավելի քան 70 հազար NVIDIA Rubin և Blackwell GPU: Եռափուլ ընդլայնումը պետք է ավելացնի ենթակառուցվածքի հզորությունը մինչև 300 ՄՎտ:

TahawulTech-ի գնահատմամբ՝ այդ պլանների իրականացումից հետո հարթակը կկարողանա ներառվել Եվրոպայի խոշորագույն ԱԲ-հաշվարկային հարթակների շարքում։

Օբյեկտում օգտագործվում է NVIDIA Spectrum-X Ethernet ցանցը, իսկ հաշվարկային, ցանցային, էներգետիկ ենթակառուցվածքը և հովացման համակարգը միավորված են միասնական ճարտարապետության մեջ:

Firebird-ի տվյալներով՝ օգտագործվող լուծումը թույլ է տալիս տեղադրել մինչև 40%-ով ավելի GPU նույն ֆիզիկական մակերեսի վրա, ինչը պետք է բարձրացնի էլեկտրաէներգիայի յուրաքանչյուր մեգավատի օգտագործման արդյունավետությունը:

Firebird-ը նաև հայտարարել է, որ NVIDIA-ն մտադիր է ներդրումներ կատարել ընկերությունում CoreWeave-ի ավելի վաղ կատարած ներդրումից հետո: Ներդրումները նախատեսվում է օգտագործել Firebird-ի ենթակառուցվածքի և ներկայության ընդլայնման համար emerging և frontier markets-ում:

Ընկերության միջազգային էքսպանսիան արդեն դուրս է եկել Հայաստանի սահմաններից: Firebird-ը հնարավորություն է ստացել Ղազախստանի Data Centre Valley-ում զարգացնել 125 ՄՎտ ԱԲ-ենթակառուցված: Ինչպես գրում է TahawulTech-ը, նախագիծը պաշտպանված է համապատասխան պետական թույլտվություններով և ԱՄՆ առևտրի նախարարության Արդյունաբերության և անվտանգության բյուրոյի արտահանման արտոնագրմամբ:

Մինչև 2028 թվականի վերջը Firebird-ը նախատեսում է Հայաստանում, Ղազախստանում և այլ frontier markets-ում իր ԱԲ-ենթակառուցվածքի համախառն հզորությունը հասցնել շուրջ 2 ԳՎտ-ի:

NVIDIA-ի հիմնադիր և գլխավոր տնօրեն Ջենսեն Հուանգը հայտարարել է, որ Firebird-ի հետ համատեղ ստեղծվող ենթակառուցվածքը պետք է Հայաստանում և Ղազախստանում հետազոտողներին, ստարտափներին և ընկերություններին տրամադրի հաշվարկային հիմք՝ սեփական ԱԲ-լուծումները զարգացնելու և գլոբալ ԱԲ–տնտեսությանը մասնակցելու համար:

Հայկական օբյեկտը ստեղծվել է վեց ամսից փոքր-ինչ ավելի ժամանակահատվածում: Schneider Electric-ը դրա համար մատակարարել է կրիտիկական նշանակություն ունեցող էներգետիկ ենթակառուցվածք, ներառյալ միջին և ցածր լարման սարքավորումներ, անխափան սնուցման համակարգեր և սերվերային դարակաշարեր:

Vertiv-ը մշակել է հովացման ճարտարապետություն, որը համադրում է սառեցված ջրի հիման վրա համակարգերը, կառավարման միջոցները և TrimCooler տեխնոլոգիան:

Firebird-ը նաև Perplexity-ն անվանում է օբյեկտի առաջին հաճախորդներից մեկը: Ընկերության տվյալներով՝ ենթակառուցվածքն օգտագործվելու է Perplexity-ի որոնողական-պատասխանող ծառայության, ԱԲ-գործակալների և digital coworker հարթակին աջակցելու համար։

Dell Technologies-ի տնօրենների խորհրդի նախագահ և գլխավոր տնօրեն Մայքլ Դելը հայտարարել է, որ ԱԲ–գործարանը պետք է ընդլայնի Հայաստանի հնարավորություններն արհեստական բանականության տեղական մշակման և ներդրման ուղղությամբ, ինչպես նաև աջակցի sovereign AI-ի (սուվերեն ԱԲ-ի) զարգացմանը, հետազոտություններին և տնտեսական աճին:

TahawulTech-ը նշում է, որ Հրազդանում օբյեկտի գործարկումը դարձավ Firebird-ի գլոբալ ԱԲ-ենթակառուցվածքային հարթակի օպերացիոն դեբյուտը և, ինչպես ակնկալվում է, կարող է նպաստել Հայաստան ԱԲ-ընկերությունների, հետազոտողների և տեխնոլոգիական ներդրումների ներգրավմանը: