Հայաստանցիները դժգոհում են առցանց վարկավորման համակարգում խարդախության դեպքերից․ ԿԲ–ից արձագանքում են
ԵՐԵՎԱՆ, 25 մարտի․/ԱՌԿԱ/․ ՀՀ ԿԲ–ն ուսումնասիրում է էքսպրես վարկավորման առցանց համակարգի պաշտպանության հնարավոր խոցելիությունները զեղծարարության հաճախակի դեպքերի պատճառով, հայտարարել է ԿԲ նախագահ Մարտին Գալստյանը։
«Եթե պարզվի, որ բանկերը չեն գործարկել համապատասխան ապահովման մեխանիզմները, և քաղաքացիները վնասներ են կրել, կտրվեն փոխհատուցումներ։ Սակայն, նախնական գնահատականներով, հիմնականում քաղաքացիներն իրենք են տրամադրում (զեղծարարներին) բոլոր անհրաժեշտ անձնական տվյալները», – նշել է Գալստյանը նախօրեին ԱԺ ֆինանսավարկային և բյուջետային հարցերի մշտական հանձնաժողովի նիստի ժամանակ։
Նրա խոսքով, կարգավորիչը տեղյակ է այս խնդրի մասին, արդեն կազմակերպվել է քննարկում զեղծարարների զոհ դարձած քաղաքացիների հետ։
«Բանկերի հետ նախնական քննարկումների արդյունքում պարզվել է, որ, ցավոք, դեպքերի ճնշող մեծամասնությունում մարդիկ իրենք են իրենց անձնական տվյալները տրամադրում զեղծարարներին։ Ինչ-որ կերպ քաղաքացիներից հայթայթում են իրենց անձնական տվյալները, ինչը նրանց թույլ է տալիս առանց որևէ խնդրի մուտք գործել նրանց անձնական ֆինանսական տարածք», – ասել է Գալստյանը։
Նրա խոսքով, կարելի է ընդհանրապես լիկվիդացնել առցանց վարկերի տրամադրման համակարգը, բայց այդ դեպքում քաղաքացիները կբախվեն նոր դժվարությունների հետ։ «Դա կնշանակի, որ նրանք ստիպված կլինեն անձամբ դիմել բանկ, ինչը կհանգեցնի լրացուցիչ ծախսերի և ժամանակի կորստի», – ասել է Գալստյանը։