Team Telecom Armenia-ն հայտարարեց վերաբրենդավորման ավարտի մասին
ԵՐԵՎԱՆ, 3 մայիսի./ԱՌԿԱ/. Team Telecom Armenia հեռահաղորդակցական օպերատորը պաշտոնապես հայտարարեց վերաբրենդավորման ավարտը, որը մեկնարկել էր «Վեոն Արմենիա»-ի (ապրանքանիշը՝ Beeline) 100% բաժնետոմսերը ձեռք բերելուց հետո։ Գործընթացի ավարտը նշանավորվեց Երևանի Հյուսիսային պողոտայում արդիականացված գլխավոր սերվիս կենտրոնի բացմամբ:
Ինչպես նշեց Team Telecom Armenia-ի գլխավոր տնօրեն Հայկ Եսայանը, 1,5 տարվա թիմային ահռելի աշխատանքի ու նվիրվածության շնորհիվ այսօր Team-ը շուկա է մտնում նոր, համարձակ կոնցեպտով ու ծրագրերով:
«Հպարտությամբ կարող ենք նշել, որ վերաբրենդավորման շնորհիվ Team Telecom ընկերությունն այժմ ամբողջովին հայկական է: Թիմային աշխատանքի արդյունքում ստեղծվել է ապրանքանիշ, որը նախատեսում է իրականացնել մեծ նախագծեր շուկայում» ,- ասաց նա:
Եսայանը նշեց, որ ընկերության շարժիչ ուժն ու ոգին թիմն է, թիմային աշխատանքը. բրենդի անվան հիմքում հենց այս գաղափարն է ընկած։
Նա ընդգծեց, որ Team Telecom Armenia-ն տրամադրում է և շարունակելու է տրամադրել հաճախորդներին ծառայությունների ամենալայն շրջանակը հայկական շուկայում՝ ընդլայնելով դրանց տեսականին:
Ռազմավարական նպատակներ
Որպես ռազմավարական ուղղություն Team-ը Հայաստանում սկսել է կառուցել տարածաշրջանում եզակի NGN (Next Generation Network) ցանցը, որը թույլ կտա յուրաքանչյուր բաժանորդի հասցնել 25 Գբ/վ արագությամբ ինտերնետ։
«Շուտով ցանցը կհայտնվի Դիլիջանում, իսկ Երևանում այդ ցանցից կարողանում են օգտվել Դավթաշեն և Արաբկիր համայնքների շուրջ 55 հազար բաժանորդներ», - նշեց նա:
Team Telecom Armenia ընկերության կոմերցիոն և վերաբրենդավորման նախագծերի ղեկավար Էլինա Գրբաշյանն իր հերթին նշեց, որ Team Telecom Armenia-ի սպասարկման և վաճառքի կենտրոններում կարելի է ձեռք բերել տարբեր տեխնիկա (սմարթֆոններ, ականջակալներ, խելացի տան համար նախատեսված լուծումներ և այլն):
Նոր ծրագրեր
Գլխավոր տնօրենի խոսքով, երկրի տարածքում գործում է Team Telecom Armenia-ի 78 մասնաճյուղ: «ԱՌԿԱ» գործակալության թղթակցի հետ զրույցում Եսայանը հայտնեց, որ ապագայում չի նախատեսվում ավելացնել մասնաճյուղերի թիվը, ընկերությունը պատրաստվում է անցնել հաճախորդների սպասարկման գործընթացի թվայնացման:
«Նոր մասնաճյուղեր գրեթե չեն լինի, քանի որ ամբողջ աշխարհում ընթանում է թվայնացման միտում: Ելնելով դրանից՝ մենք ևս պետք է վերափոխվենք», - ասաց նա:
Խոսելով ընկերության հետագա զարգացման պլանների և տեխնոլոգիական արդիականացման մասին՝ Եսայանը տեղեկացրեց, որ այս պահին գործընթացն ընթանում է մեծ թափով: Նա նշեց, որ շարունակվում է ֆիքսված ցանցի արդիականացումը, ստեղծվում է օպտիկամանրաթելային ցանց, որն էապես տարբերվում է գործողներից նրանով, որ յուրաքանչյուր բաժանորդ կկարողանա միանալ ցանցին առանձին մալուխի միջոցով:
Անդրադառնալով ներդրումների հարցին՝ Եսայանը նշեց, որ այս պահին քննարկվում է խոշոր ներդրումային ծրագիր, որի մասին շուտով կհայտարարվի:
«Այս պահին իրականացվել են խոշոր ներդրումներ, որոնք ամբողջովին ներգրավվել են ինչպես ներքին, այնպես էլ վարկային ռեսուրսների հաշվին», - ընդգծեց նա:
Եսայանը տեղեկացրեց, որ այս կարճ ժամանակահատվածում հաջողվել է իրականացնել ծրագրեր, որոնք ապագայում բեկումնային փոփոխություններ են բերելու տելեկոմ ոլորտ՝ նպաստելով ոչ միայն ընկերության առաջխաղացմանը, այլ նաև Հայաստանում ՏՏ ոլորտի զարգացմանը:
Ընկերության մասին
Team Telecom Armenia-ն ՀՀ տարածքում տրամադրում է ինտերնետի, թվային հեռուստատեսության, բջջային և ֆիքսված հեռախոսակապի ծառայություններ։ Team Telecom Armenia-ն լիովին հայկական բրենդ է և հազարավոր արհեստավարժ մասնագետների հզորագույն թիմ: