Ղարաբաղում նախատեսվում է «Արցախֆոն» բջջային հեռախոսների արտադրություն սկսել. վարչապետ
ՍՏԵՓԱՆԱԿԵՐՏ, 9 հունիսի. /ԱՌԿԱ/. Ղարաբաղում նախատեսում է բջջային հեռախոսների արտադրություն սկսել, հայտարարել է ԼՂՀ վարչապետ Արա Հարությունյանը շաբաթ օրը տեղի ունեցած ՀՀ հանրային ծառայությունները կարգավորող հանձնաժողովի պատվիրակության հետ հանդիպման ընթացքում, պատվիրակությունը գլխավորել է հանձնաժողովի նախագահ Ռոբերտ Նազարյանը։
Ինչպես հաղորդում է ԼՂՀ կառավարության տեղեկատվության և հասարակայնության հետ կապերի բաժինը, հանդիպման ընթացքում ԼՂՀ վարչապետը հյուրերին է ներկայացրել «Արցախֆոն»-ի առաջին նմուշը, որն իրեն է նվիրել «Թեքնոլոջի ընդ Սայնս Դայնամիքս» ընկերության հիմնադիր Վահան Շաքարյանը:
Կառավարության ղեկավարի խոսքով՝ աշխատանքներ են տարվում Արցախում այդ հեռախոսի արտադրությունը սկսելու ուղղությամբ:
Հարությունյանը կարևորել է պարբերական շփումները երկու հանձնաժողովների միջև՝ աշխատանքների արդյունավետ համակարգման և մասնագիտական վերապատրաստման համատեքստում:
Վարչապետը հետաքրքրվել է ՀՀ-ում էլեկտրաէներգիայի սակագնի հավանական բարձրացումից և հետագա միտումներից։
Նա նշել է, որ կախված սակագներից՝ կարող են համապատասխան փոփոխություններ լինել Արցախի էներգետիկ ներքին ռեսուրսների շահագործման մոտեցումներում:–0–