Նոր iPhone 17-ի վերանորոգման գները, նախորդ մոդելի համեմատ, կաճեն 4 անգամ
ԵՐԵՎԱՆ, 11 սեպտեմբերի․/ԱՌԿԱ/․ Նոր iPhone 17-ի վերանորոգման գները, նախորդ մոդելի համեմատ, կաճեն 4 անգամ։
Մարտկոցի փոխարինման գինն էականորեն կբարձրանա։ Եթե iPhone 16 Pro-ի վերանորոգման աշխատանքն արժե մի փոքր ավելի, քան 10 000 ռուբլին, ապա նոր iPhone 17-ի դեպքում կգանձվի շուրջ 45 000 ռուբլի։
Մասնագետներն այս թռիչքային գնաճը կապում են մարտկոցների դիզայնի փոփոխության հետ։ Էկրանի փոխարինման գինը, որը Apple-ի սեփականատերերի շրջանում ամենատարածված ծառայություններից մեկն է, կբարձրանա գրեթե 3 անգամ, հաղորդում է Shot–ը։
Այժմ iPhone 16-ում դա կարվի 40-45 000 ռուբլով, մինչդեռ նոր iPhone-ների դեպքում նման աշխատանքը կարժենա մոտ 105 000 ռուբլի։
Սպասարկման կենտրոնի աշխատակիցները նշում են, որ հիմնական խնդիրը նոր iPhone 17-ի և iPhone Air-ի պահեստամասերի պակասն է։
Վերջինիս վերաբերյալ մասնագետները նաև զգուշացնում են պոտենցիալ լուրջ խնդրի մասին։ Շատ բարակ պատյանի պատճառով այն կարող է ենթարկվել դեֆորմացիայի։
Սպասարկման ոլորտի աշխատակիցները դեռ չգիտեն, թե ինչպես են վերանորոգելու այդ պատյանները և որքան կարժենա այդ աշխատանքը։