Հայաստանում սեպտեմբերից կսկսի գործել պետգնումների մրցույթների անցկացման էլեկտրոնային համակարգը. նախարար
ԵՐԵՎԱՆ, 3 հուլիսի. /ԱՌԿԱ/. Հայաստանում սեպտեմբերից կսկսի գործել պետգնումների մրցույթների անցկացման էլեկտրոնային համակարգը, հինգշաբթի կառավարության նիստի ընթացքում ասաց ՀՀ ֆինանսների նախարար Գագիկ Խաչատրյանը:
«Համապատասխան աշխատանքային խումբ է ստեղծվել, անցկացվում են ուսումնասիրություններ բոլոր գերատեսչությունների մասնակցությամբ, և մինչև սեպտեմբերի 10-ը նախատեսվում է ամփոփել բոլոր առաջարկների արդյունքները: Դրանից հետո կանցնենք պետգնումների մրցույթների անցկացման էլեկտրոնային համակարգին», - ասաց Խաչատրյանը:
ՀՀ վարչապետ Հովիկ Աբրահամյանն իր հերթին նշեց, որ կառավարությունը պետք է ձեռնպահ մնա այնպիսի որոշումներ ընդունելուց, որոնք ոչ մրցութային հիմքով գնումների իրականացում են նախատեսում:
«Առաջարկում եմ բոլոր նախարարություններին հաշվի առնել, որ 2015 թ.-ից բոլոր պետգնումներն իրականացվելու են բացառապես մրցութային հիմքի վրա, բացառությամբ օպերատիվ դեպքերի, որոնք կապված են տարերային աղետների հետևանքների վերացման հետ», - ասաց Աբրահամյանը:
Նա նշեց, որ օպերատիվ հարցերով կարող են գնումներ անցկացվել մրցույթից դուրս, սակայն մնացած գնումների հարցում պետք է տենդերներ անցկացվեն, հակառակ դեպքում կառավարությունը ավելորդ կասկածների և քննադատությունների առիթ կտա:
Նրա խոսքերով՝ Ֆինանսների նախարարությանը հանձնարարվել է գնումների մրցույթների անցկացման միասնական էլեկտրոնային համակարգ մշակել, ինչը ևս թույլ կտա բացառել այդ համակարգի հասցեին հնչող ցանկացած քննադատություն:-0-