Apple-ը ներկայացրել է գաջեթների նոր շարք․ iPhone 17, բարակ iPhone Air, նոր ականջակալներ

ԵՐԵՎԱՆ, 10 սեպտեմբերի․/ԱՌԿԱ/․ Apple-ը ներկայացրել է նոր iPhone 17-ը, դրա բարակ տարբերակը՝ iPhone 17 Air-ը, և ավելի հզոր iPhone 17 Pro-ն:

iPhone 17-ը սնուցվում է A19 չիպով՝ վեց միջուկանի գլխավոր պրոցեսորով և հինգ միջուկանի գրաֆիկական պրոցեսորով: Apple-ի տվյալներով՝ iPhone 17-ը նախորդ մոդելից ութ ժամ ավել է աշխատում և ունի Qi2 անլար լիցքավորման ստանդարտ՝ մարտկոցի ավելի արագ վերականգնման համար: Էկրանի չափը 6.3 դյույմ է:

Նոր iPhone-ը հասանելի է հինգ գույներով՝ սև, մանուշակագույն, երկնագույն, կանաչ և սպիտակ։

Apple-ի տվյալներով՝ բարակ iPhone 17 Air-ը ունի MacBook Pro դասի հաշվողական հզորություն։

Ներկայացված է նաև սմարթֆոնի երրորդ տարբերակը՝ iPhone 17 Pro-ն (երեք գույներով՝ կապույտ, մոխրագույն և նարնջագույն): Pro տարբերակի պրոցեսորը մեկ միջուկով ավելի հզոր է, քան Air-ինը։

iPhone 17-ի գինը սկսվում է 799 դոլարից, Air-ը՝ առնվազն 999 դոլարից, իսկ Pro-ն՝ 1099 դոլարից։ Դրանց վաճառքը կսկսվի սեպտեմբերի 19-ին։

Ընկերությունը ներկայացրել է նաև Apple Watch Series 11-ը, որի պատյանը շատ բարակ է, սարքն ունի 5G հասանելիություն: Բացի այդ, հասանելի են Apple Watch-ի համար նախատեսված բազմագույն ժապավեններ՝ կանաչ, դեղձագույն, սև և կապույտ՝ տպագրություններով:

Շնորհանդեսի ընթացքում ցուցադրվեցին նաև նոր AirPods Pro 3 ականջակալները: Հիմնական նորամուծություններից մեկը տարբեր լեզուներից իրական ժամանակում թարգմանության գործառույթներն ու լսողական սարքն են: Բացի այդ, ականջակալներն ունեն աղմուկի նվազեցման թարմացված համակարգ: