ԵՏՀ-ն նշել է ԵԱՏՄ տարածքում բջջային ռոումինգի չեղարկման ամսաթիվը
ԵՐԵՎԱՆ, 11 հուլիսի․/ԱՌԿԱ/․ Եվրասիական տնտեսական միության տարածքում (ԵԱՏՄ) բջջային ռոումինգի վերացումը նախատեսված է 2028 թ.-ի հունվարի 1-ին։ Սա պայմանավորված է հեռահաղորդակցության օպերատորների ֆինանսական կորուստների վերացման հարցի լրացուցիչ ուսումնասիրության անհրաժեշտությամբ, ՏԱՍՍ-ին հայտնել են Եվրասիական տնտեսական հանձնաժողովի (ԵՏՀ) մամուլի ծառայությունից։
«2025 թ.-ի հուլիսի 8-ին Եվրասիական տնտեսական հանձնաժողովի խորհրդի նիստում հաստատվեց ռոումինգում հավասար սակագներ ներդնելու ծրագրի իրականացման նոր վերջնաժամկետ՝ 2027 թ.-ի չորրորդ եռամսյակը։ Մինչ այդ հանձնաժողովը նախատեսում է կայացնել բոլոր անհրաժեշտ որոշումները և վերացնել ռոումինգը 2028 թ.-ի հունվարի 1-ից։ Ռոումինգը վերացնելու (ռոումինգում կապի ծառայությունների համար հավասար սակագներ ներդնելու) նախաձեռնությունը աջակցվում է Եվրասիական տնտեսական միության բոլոր երկրների կողմից», - ասվում է հաղորդագրության մեջ։
Նշվում է, որ նախկինում նախատեսվում էր չեղարկել ռոումինգը 2025 թ.-ին, սակայն բջջային օպերատորների ֆինանսական կորուստների հավասարեցման հարցի լրացուցիչ ուսումնասիրության անհրաժեշտության նպատակով կողմերը հետաձգել են չեղարկման ամսաթիվը։
«Սա թույլ կտա Եվրասիական տնտեսական հանձնաժողովին, անդամ պետությունների հետ համատեղ, ավելի մանրամասն վերլուծել միջազգային կապի սակագների մակարդակները, միջօպերատորային ռոումինգի սակագները և մշակել օպտիմալ սակագնային տարբերակ, որը հաշվի կառնի ինչպես բաժանորդների, այնպես էլ հեռահաղորդակցության օպերատորների շահերը»,-հաղորդել է ԵՏՀ-ն։