Հայաստանում կմշակվեն ՏՀՏ ոլորտում R&D ծրագրերի չափանիշներ
ԵՐԵՎԱՆ, 14 փետրվարի․/ԱՌԿԱ/․ Հայաստանում կձևավորվի գիտական հետազոտությունների և փորձարարական մշակումների (R&D) աշխատանքների որակման մասնագիտական հանձնաժողով։ Այս մասին հայտարարվել է ՀՀ բարձր տեխնոլոգիական արդյունաբերության նախարար Մխիթար Հայրապետյանի և ՏՀՏ գործատուների միության խորհրդի ընդլայնված կազմ նախաճաշ–հանդիպման ժամանակ։
Այս նախաձեռնությունը կոչված է խթանելու գիտահետազոտական աշխատանքները և նպաստելու ոլորտում գիտական հիմքի ամրապնդմանը, հայտնում են նախարարությունից։
Նախարարը պարզաբանել է ՀՀ կառավարության կողմից փետրվարի 13-ին ընդունված որոշումը, որով սահմանվել է բարձր տեխնոլոգիաների ոլորտի պետական աջակցության ենթակա գործունեության տեսակների ցանկը, որի շնորհիվ 32 ուղղությամբ գործող ընկերությունները կկարողանան օգտվել պետական աջակցություններից և հարկային արտոնություններից, ինչը կնպաստի ոլորտի զարգացմանը և նոր հնարավորությունների ստեղծմանը։
ՏՀՏ գործատուների միության ներկայացուցիչները նշել են առկա խնդիրները և առաջարկել են Միության աջակցությունը՝ Միության անդամ ընկերությունների մասնագետների ներգրավմամբ ձևավորված աշխատանքային խմբի հետ աշխատել կարգավորումների արդյունավետության մոնիտորինգի և բարելավման ուղղությամբ։
Հանդիպման ավարտին ընդգծվել է, որ նախարարությունը բաց է բոլոր շահագրգիռ կողմերի առաջարկների համար և պատրաստ է շարունակել համատեղ ջանքերը՝ ուղղված բարձր տեխնոլոգիաների ոլորտի երկարատև և կայուն զարգացմանը։