Ռոստեխի ռադիոփարոսը տեղադրվել է Հայաստանի հարավում. այն կօգնի ինքնաթիռներին կողմնորոշվել լեռնային տեղանքում

ԵՐԵՎԱՆ, 20 մայիսի․/ԱՌԿԱ/․ «Ազիմուտ» աերոնավիգացիոն համակարգերի մշակող և արտադրող ընկերությունը (ներառված է «Ռոստեխ» կորպորացիայի կազմում) Հայաստանին մատակարարել է ռադիոփարոս, որը կօգնի ինքնաթիռներին կողմնորոշվել լեռնային տեղանքում և բարդ եղանակային պայմաններում, ՏԱՍՍ-ին հայտնել են «Ռոստեխ» պետական ​​կորպորացիայում։

Սարքավորումը տեղադրվել է Սիսիանի մոտակայքում։

«Մենք ավարտել ենք VOR/DME 2700-ի փորձարկումները Հայաստանում, որը թույլ կտա ինքնաթիռներին կողմնորոշվել օդային երթուղիներում լեռնային տեղանքում և բարդ եղանակային պայմաններում», - նշել է «Ազիմուտ» ընկերության գլխավոր տնօրենի տեղակալ Ալեքսեյ Գալչենկովը։

Նա նաև նշել է, որ ռադիոփարոսն այժմ հաջողությամբ շահագործվում է Ստավրոպոլում, Չելյաբինսկում, Կալինինգրադում, Խաբարովսկում, Նովոսիբիրսկում և Ռուսաստանի այլ քաղաքներում, ինչպես նաև օտարերկրյա օդանավակայաններում։

VOR/DME 2700 ռադիոփարոսը որոշում է ինքնաթիռի գտնվելու վայրը։ Այն գործում է VHF (Very high frequency, շատ բարձր հաճախականություն, 30-ից 300 ՄՀց) դիապազոնում և կարող է միաժամանակ ուղղորդել մինչև 200 ինքնաթիռ։ Սարքավորումը Միջազգային քաղաքացիական ավիացիայի կազմակերպության (ICAO) կողմից խորհուրդ է տրվում որպես օդային երթուղիներում նավիգացիայի հիմնական միջոց, ինչպես նաև որպես լրացուցիչ միջոց ինքնաթիռների վայրէջքի ժամանակ։