Վճարովի հաղորդագրություններ և տվյալներ անծանոթների մասին․ Telegram–ում նոր գործառույթներ են գործարկվել
ԵՐԵՎԱՆ, 10 մարտի․/ԱՌԿԱ/․ Հայտնի Telegram մեսենջերի մշակողները շարունակում են զարգացնել ծառայությունը՝ ավելացնելով նոր գործառույթներ։ Հերթական թարմացումից հետո հարթակն այժմ աջակցում է վճարովի հաղորդագրություններին, ինչի շնորհիվ բովանդակություն ստեղծողները և հասարակական գործիչները ավելի մեծ վերահսկողություն կստանան իրենց գաղտնիության նկատմամբ և կկարողանան դրամայնացնել իրենց ճանաչվածությունը։
Բացի այդ, նոր չաթերում այժմ ավելի շատ տվյալներ են ցուցադրվում զրուցակցի մասին, իսկ Telegram Premium-ի բաժանորդագրության համար կարելի է վճարել աստղերով, գրում է 3dnews.ru-ն։
Telegram-ի օգտատերերը, ովքեր հաճախ հաղորդագրություններ են ստանում անծանոթներից, այժմ կարող են վճարովի դարձնել հաղորդագրություններ ուղարկելը նրանց համար, ովքեր իրենց կոնտակտների ցանկում չեն: Դրա շնորհիվ կարելի է «պաշտպանվել» նյարդայնացնող հաղորդագրություններից, ինչպես նաև ստանալ աստղեր այն ժամանակի համար, որը հատկացվում է անծանոթ կոնտակտներին։
Նոր գործառույթը թույլ կտա ֆիլտրել անցանկալի հաղորդագրությունները՝ խուսափելով չաթերի ավելորդ ծանրաբեռնվածությունից, ինչպես նաև ստանալ իսկապես կարևոր հաղորդագրություններ անծանոթներից միայն այն դեպքում, եթե նրանք պատրաստ են վճարել հաղորդագրություն ուղարկելու համար: Չնայած այն հանգամանքին, որ օգտատերը բաց է մնալու հաղորդակցության համար, նա կկարողանա իրեն «պաշտպանել» հաղորդագրությունների և սպամի չափազանց մեծ հոսքից:
Նմանատիպ կարգավորումը հասանելի է խմբերում, որտեղ այն կարելի է կիրառել ալիքների մեկնաբանությունների համար: Այս կարգավորումը կօգնի խմբերին պաշտպանվել սպամից, ինչպես նաև կխրախուսի խմբի անդամներին մնալ թեմայի շրջանակում: Բացի այդ, խմբի սեփականատերերի համար նոր գործառույթը դրամայնացնելու և աստղեր վաստակելու լրացուցիչ միջոց կլինի: Կա ճկուն կարգավորումների հնարավորություն, երբ առանձին օգտատերերը և մասնակիցները դեռևս կունենան անվճար մեկնաբանություններ ուղարկելու հնարավորություն։