Samsung–ը Երևանի բժշկական կենտրոնին թվային ստացիոնար ռենտգեն սարքավորում է նվիրել
ԵՐԵՎԱՆ, 29 հոկտեմբերի. /ԱՌԿԱ/. Samsung Electronics ընկերությունը Երևանի «Սուրբ Գրիգոր Լուսավորիչ» բժշկական կենտրոնին թվային ստացիոնար ռենտգեն սարքավորում է նվիրել, որը միակն է Հայաստանում և երկրորդը` ԱՊՀ տարածաշրջանում։
ՀՀ վարչապետ Տիգրան Սարգսյանը ծանոթացել է կենտրոնը համալրած մեկ ժամում շուրջ 200 հիվանդի հետազոտելու հնարավորություն ունեցող ժամանակակից թվային ստացիոնար ռենտգեն սարքավորմանը։
Հաղորդագրության համաձայն, բժշկական կենտրոնը հնարավորություն է ընձեռելու նաև Երևանի Մ. Հերացու անվան պետական բժշկական համալսարանի ուսանողներին գործնական դասընթացներ անցկացնել նշված սարքավորումով:
Կառավարության ղեկավարին ուղեկցում էին առողջապահության նախարար Դերենիկ Դումանյանը, Հայաստանում Samsung Electronics ընկերության պաշտոնական ներկայացուցչության ղեկավար Անդրանիկ Շահբազյանը, ինչպես նաև ընկերության կովկասյան գրասենյակի ղեկավար Սանգ Պիլ Չանը։ –0–