Facebook–ն անջատել է արհեստական ինտելեկտը բոտերի «ապստամբության» պատճառով
ԵՐԵՎԱՆ, 1 օգոստոսի. /ԱՌԿԱ/. Facebook–ն անջատել է արհեստական ինտելեկտի իր համակարգերից մեկը նրանից հետո, երբ ընկերության մասնագետները հայտնաբերել են, որ բոտերը սկսել են շփվել ոչ թե անգլերեն, այլ սեփական լեզվով, որը հասկանալի չէր մարդկանց։ Այդ մասին հայտնում է «Կոմերսանտը»։
Արհեստական ինտելեկտը սեփական լեզու է ստեղծել ավելի արագ և դյուրին կերպով տեղեկություն փոխանակելու նպատակով։ Դրանից հետո Facebook–ն անջատել է համակարգի մի մասը և վերածրագրավորել է մյուս բոտերին, որ նրանք կարողանան շփվել միայն անգլերեն լեզվով։
Ավելի վաղ Իլոն Մասկը` SpaceX և Tesla ընկերությունների հիմնադիրը, հայտնել է, որ արհեստական ինտելեկտն ամենամեծ ռիկսն է, որի հետ կբախվի մարդկությունը։ Գործարարի կարծիքով, մշակողներին, ովքեր կատարելագործում են արհեստական ինտելեկտը, առաջատար տեխնոլոգիաների մրցավազքում կարող է զսպել միայն պետկարգավորումը։
Մինչդեռ կառավարությունները շահագրգռված են նման մշակումներով։ Չինաստանը ծրագրում է դառնալ արհեստական ինտելեկտի կենտրոն մինչև 2030 թվականը։ ՉԺՀ կառավարությունը հաստատել է համապատասխան տեխնոլոգիաների զարգացման և ներդրման եռափուլ ծրագիր։ -0-