Արցախի դպրոցներին շուրջ 250 համակարգիչ է տրամադրվել. ՀՀ ԿԳՆ

ԵՐԵՎԱՆ, 11 հունիսի. /ԱՌԿԱ/. Լեռնային Ղարաբաղի Հանրապետության դպրոցներին Հայաստանի կրթության և գիտության նախարարության կողմից շուրջ 250 համակարգիչ է տրամադրվել, նախօրեին Ստեփանակերտում լրագրողներին ասաց գերատեսչության ղեկավար Արմեն Աշոտյանը։

Աշոտյանի խոսքով, առաջիկայում ծրագրվում է ղարաբաղյան դպրոցներին ևս 200 համակարգիչ տրամադրել։

«Տարվա ընթացքում նախատեսվում է ավարտել Արցախի դպրոցների` համակարգիչներով զինելու հարցը»,– ասաց նա։

Նախարարը հայտնեց, որ ղարաբաղյան դպրոցներին տրամադրվել են նաև հազարավոր ուսումնական նյութեր և ֆիլմեր` ավելացնելով, որ «այս անգամ մենք ԼՂՀ դպրոցների համար նաև էլեկտրոնային կրթության ու այլ ուսումնական նյութեր ենք բերել»։

Հայաստանի կրթության և գիտության նախարարը հայտարարեց, որ Արցախում հաջողությամբ իրականացվել են բարձրագույն կրթության ոլորտի բարեփոխումներ։

«Դրանք թույլ են տալիս Արցախի կրթական տարածքը դիտարկել որպես եվրոպական փաստացի կրթական տարածության մի մաս»,– նշեց Աշոտյանը։

Հայաստանի կրթության և գիտության նախարարության պատվիրակությունն Աշոտյանի գլխավորությամբ աշխատանքային այցով գտնվում է Արցախում, երկուշաբթի հանդիպումներ է ունեցել ԼՂՀ նախագահ Բակո Սահակյանի, խորհրդարանի խոսնակ Աշոտ Ղուլյանի և վարչապետ Արա Հարությունյանի հետ։ -0-