Հայաստանն ու Mistral AI ֆրանսիական ստարտափը միավորում են ջանքերը AI–ի զարգացման համար

ԵՐԵՎԱՆ, 16 մայիսի․/ԱՌԿԱ/․ Հայաստանը նախատեսում է համատեղ նախաձեռնություններ իրականացնել Mistral AI ֆրանսիական ընկերության հետ, որն արհեստական բանականության ոլորտում միջազգային ճանաչում ունեցող ստարտափ է։

Mistral AI-ի ներկայացուցիչները, ՀՀ բարձր տեխնոլոգիաների արդյունաբերության փոխնախարար Գևորգ Մանթաշյանն ու տեխնոլոգիական ընկերությունների ղեկավարները քննարկել են արհեստական բանականության ուղղվածությամբ մի շարք համատեղ նախաձեռնություններ, գործակցության հնարավորություններ։

Կազմակերպվել է նաև «Արհեստական բանականությունը՝ հանրային կառավարման փոխակերպման համար» թեմայով աշխատաժողով՝ Mistral AI–ի ներկայացուցիչների մասնակցությամբ։

Հանդիպմանն անդրադարձ են կատարվել արհեստական բանականության, մեքենայական ուսուցման և ավտոմատացման, կառավարման, անվտանգության և տնտեսական զարգացման համաշխարհային ԱԲ միտումներին, ԱԲ-ի վրա հիմնված առաջատար կառավարությունների փորձի ուսումնասիրություններին, ԱԲ-ի ազդեցությանը կառավարության գործունեության և քաղաքացիական ծառայությունների վրա, արհեստական բանականության կիրառության միջոցով հանրային հատվածում խարդախության, գնումների և ֆինանսական գործարքների անոմալիաների հայտնաբերմանը, ԱԲ մեխանիզմներով խելացի կառավարմանն ու տվյալների վերյուծությանը, ԱԲ կիրառմամբ՝ արդարադատությանը, առողջապահական և սոցիալական ծառայություններին աջակցման և բարելավելավման մեխանիզմներին, ինչպես նաև թեմային վերաբերող մի շարք այլ հարցերի, այդ թվում՝ Հայաստանի Հանրապետության համար առաջարկվող արհեստական բանականության ներդրման առաջնահերթ նախաձեռնություններին:

Ավելի վաղ հայտնի է դարձել, որ 2025թ. փետրվարի 10-ին՝ Ֆրանսիայի մայրաքաղաք Փարիզում, ԲՏԱ նախարարության և «Mistral AI» ընկերության միջև համաձայնագիր է ստորագրվել։

Փաստաթղթով նախատեսվում է Հայաստանում բարելավել ԱԲ ենթակառուցվածքները, աջակցել ԱԲ հենքով բիզնես լուծումներին և բարելավել հանրային կառավարումը ԱԲ հիմքով գործող GovTech ծրագրի միջոցով՝ կիրառելով «Mistral AI» ընկերության փորձառությունը առևտրային և բաց կոդով արհեստական բանականության տեխնոլոգիաների ոլորտում: Նախարարության հետ համագործակցության շրջանակներում «Mistral AI»-ը Հայաստանում կօգտագործի իր փորձառությունը, կանցկացնի վերապատրաստումներ, կառաջարկի ԱԲ նպատակային լուծումներ։

Mistral AI–ի մասին

Mistral AI-ը արհեստական ​​բանականության ոլորտի առաջատար ֆրանսիական ստարտափ է, որը հիմնադրվել է 2023 թվականի ապրիլին երեք հետազոտողներ Արթուր Մենշի, Գիյոմ Լամպլի և Թիմոթի Լակրուայի կողմից։ Ընկերության առաքելությունն է ժողովրդավարացնել արհեստական ​​բանականությունը բաց կոդի, արդյունավետ և նորարարական արհեստական ​​բանականության մոդելների, պրոդուկտների և լուծումների միջոցով։