Անշրջահայաց գործողությունները սոցցանցերում կարող են վտանգել Հայաստանի անվտանգությունը. փորձագետ
ԵՐԵՎԱՆ, 2 հունիսի. /ԱՌԿԱ/. Հայաստանի քաղաքացիների անշրջահայաց շփումը սոցցանցերում և անձնական տեղեկության ներկայացումը սպառնալիք է հանրապետության անվտանգության համար, երեքշաբթի լրագրողներին ասաց տեղեկատվական անվտանգության փորձագետ Տիգրան Քոչարյանը։
«Ամեն օր սոցցանցերում ստեղծվում են էջեր, որոնց օգտատերերը ներթափանցում են Հայաստանի տեղեկատվական դաշտ։ Սոցիալական ցանցերը մարդկանց ավելի խոցելի են դարձնում, քանի որ այնտեղ տեղադրվում է անձնական բնույթի տեղեկատվություն։ Մասնավորապես, Հայկական բանակի զինծառայողները դնում են իրենց լուսանկարները և հրապարակում տեղեկություն, որից կարող են օգտվել այլ երկրների հատուկ ծառայությունները»,– ասաց Քոչարյանը։
Այդ կապակցությամբ փորձագետը կարծում է, որ անհրաժեշտ է տանել բացատրական աշխատանք, հատկապես զինծառայողների շրջանում, այն մասին, թե ինչի կարող է հանգեցնել այդպիսի վարքը սոցցանցերում։
«Սոցցանցերում պետք է շփվել նրանց հետ, ում հետ ծանոթ ես։ Բոլորս գիտենք, թե ինչ հեշտ է այսօր կեղծ էջեր բացել»,– ասաց Քոչարյանը։
Բացի այդ, ըստ նրա, .am դոմենում գրանցված են կեղծ կայքեր, որոնք ապատեղեկատվություն են տարածում։ Ինչպես նշեց Քոչարյանը, ոչ պակաս վտանգավոր է այն իրավիճակը, երբ ադրբեջանական կայքերը սկսում են տեղեկություն տարածել Ադրբեջանի նախագահ Իլհամ Ալիևի դեմ` դրանով դրդելով հայ օգտատերերին առաջ տանել այդ կայքերը։
«Այնուհետև, երբ օգտագործողները սովորում են կայքին, այն սկսում է հակահայկական քարոզչություն իրականացնել»,– ասաց Քոչարյանը` կոչ անելով հայկական կայքերին ադրբեջանական կայքերի ուղիղ հղումներ չտալ։
Հայաստանի ազգային անվտանգության ծառայությունը մեկ շաբաթ առաջ հայտնել էր սոցիալական ցանցերից մեկում ադրբեջանական կողմի ստեղծած և ապատեղեկատվություն տարածող կեղծ էջերի ստեղծման մասին։ Այդ էջերի հեղինակները, ներկայանալով որպես Հայաստանի կամ ԼՂՀ–ի նախկին զինծառայողներ, փորձել են նամակագրություն հաստատել Հայաստանի և Արցախի բնակիչների հետ` տեղեկություն ստանալու նպատակով։ Այդ կապակցությամբ Հայաստանի ԱԱԾ–ն կոչ է արել զերծ մնալ սոցցանցերում պատահական շփումներից։ -0-