VivaCell-MTS–ը Wi-Fi ցանցով է ապահովել Ավ.Իսահակյանի անվան գրադարանի մասնաճյուղերը

ԵՐԵՎԱՆ, 5 փետրվարի. /ԱՌԿԱ/. VivaCell-MTS ընկերությունը Երևան քաղաքի կառավարման տեխնոլոգիաների կենտրոնի հետ համատեղ  Ավ.Իսահակյանի անվան գրադարանի մասնաճյուղերն ապահովել է Wi-Fi ինտերնետ հասանելիությամբ, «ԱՌԿԱ» գործակալությանը հինգշաբթի հայտնեցին ընկերության մամուլի ծառայությունից։

Հաղորդագրության համաձայն, Wi-Fi անկյուններ են ստեղծվել Ավետիք Իսահակյանի անվան գրադարանի բոլոր մասնաճյուղերում։

Տրամադրվել է «Home-Zone Turbo» փաթեթի շրջանակում գործող 13 հատ 3G երթուղիչ:

«Հաշվի առնելով արդյունավետությունը` համագործակցող կողմերը որոշել են ընդլայնել ծրագիրը: Ընթացիկ տարում նախատեսվում է ինտերնետ հասանելության սարքերով ապահովել մշակութային ևս 4 օջախ. Երևան քաղաքի պատմության, Ժամանակակից արվեստի թանգարաններում, Կարեն Դեմիրճյանի տուն-թանգարանում, ինչպես նաև «Էրեբունի» պատմահնագիտական արգելոց-թանգարանում»,– ասվում է մամուլի հաղորդագրությունում։

Ծրագրի տարեկան արժեքը կազմում է ավելի քան 2,4 մլն դրամ: Այս գրադարաններում այսօրինակ հնարավորությունների տրամադրման համար, ընդհանուր առմամբ, հատկացվել է 4,8 մլն դրամ:

ՎիվաՍել-ՄՏՍ (Ղ-Տելեկոմ) ընկերությունը հայկական շուկայում գործում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին: -0-