ՎիվաՍել-ՄՏՍ-ի աջակցությամբ Բարեկամավան սահմանամերձ գյուղն արտաքին լուսավորություն է ստացել
ԵՐԵՎԱՆ, 2 օգոստոսի. /ԱՌԿԱ/. ՎիվաՍել-ՄՏՍ-ի և Վայրի բնության և մշակութային արժեքների պահպանման հիմնադրամի (FPWC) ջանքերով գրեթե լուծվել է Տավուշի մարզի Բարեկամավան գյուղի արտաքին լուսավորության խնդիրը, հայտնում է օպերատորի մամուլի ծառայությունը։
Ինչպես նշվում է հաղորդման մեջ, Բարեկամավան գյուղն իր դիրքով խոցելի է, քանի որ գտնվում է սահմանային գոտուց մոտ 700-800մ հեռավորության վրա, ուստի ապահովագրված չէ հակառակորդի անկանխատեսելի թիրախավորումից:
Գյուղի 18 կմ երկարությամբ ճակատային հատվածն անմիջապես առնչվում է հակառակորդի դիրքերի հետ։
Բնակչության թիվը տարիների ընթացքում նվազել է, մարդիկ հեռացել են՝ ապահով ու ավելի լավ կյանք փնտրելու համար: Գյուղացիների հիշողության մեջ դեռևս պահպանվում են հակառակորդի՝ տարբեր տարիների իրականացրած դիվերսիոն գործողությունները:
Գյուղի դպրոցն ունի ընդամենը 16 աշակերտ:
Չնայած առկա դժվարություններին՝ բնակավայրում հիմնականում զբաղվում են դաշտավարությամբ, այգեգործությամբ և անասնապահությամբ։ Հողի մշակն այստեղ միշտ զգոն է: Պատճառը բնակավայրի խոցելի դիրքն է, որն առավել ակնհայտ է դառնում երեկոյան ժամերին:
Բարեկամավանն իր տեղադիրքով ամենախոցելիներից մեկն է համարվում, սակայն գյուղը տարիներ շարունակ զրկված է եղել լուսավորման համակարգից:
Խնդիրը հայտնվել է գյուղական համայնքներում ենթակառուցվածքների զարգացումը կարևորող գործընկեր կառույցների ուշադրության կենտրոնում:
ՎիվաՍել-ՄՏՍ-ի և Վայրի բնության և մշակութային արժեքների պահպանման հիմնադրամի (FPWC) ջանքերով, խնդիրը գրեթե կարգավորվել է:
«Այլընտրանքային էներգիա» նախագծի շրջանակում Բարեկամավանում ստեղծվել է արտաքին լուսավորության էներգախնայող և ամբողջությամբ նոր ենթակառուցվածք:
«Տեղակայվել է շուրջ 44 LED լուսարձակ: Լուսավորվել է մոտ 1650 մ երկարությամբ տարածություն՝ գյուղի գրեթե բոլոր հիմնական փողոցները: Համայնքների զարգացումը կարևորագույն առաջնահերթություն է գործընկեր կառույցների համար, իսկ բնապահպանական և էներգախնայող LED լուսարձակների շահագործումը տնտեսապես արդյունավետ է բյուջետային համեստ միջոցներ ունեցող գյուղերի համար»,– նշվում է հաղորդման մեջ։
Այսպիսի համակարգի շահագործումը զգալի կրճատում է էներգիայի ծախսը՝ թեթևացնելով գյուղի ֆինանսական բեռը:
Համակարգի գործարկմանը մասնակցել են ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, FPWC հիմնադրամի գլխավոր ճարտարագետ, ծրագրի համակարգող Մարտին Մարալչյանը, Նոյեմբերյան համայնքի ղեկավար Կարեն Աբազյանը, Բարեկամավանի վարչական ղեկավար Ջոնիկ Միքայելյանը և համայնքի բնակիչները:
«Ամեն անգամ, երբ մեզ հաջողվում է որևէ սահմանապահ գյուղի ինչ-որ հարցում օգտակար լինել, ուզում եմ հավատալ, որ մարդիկ չեն կոտրվի, իրենց ավելի ամուր կզգան ու կշարունակեն ապրել տեղում: Լուսավորված փողոցը տեխնիկական խնդրի լուծում չէ: Այն ավելին է, քան կարելի է մտածել: Այս ծրագիրը լուծում է մի քանի խնդիր. ամենակարևորը՝ անվտանգության, ապա՝ սոցիալական, բնապահպանական, հոգեբանական… Պակաս կարևոր չէ նաև մայրաքաղաքի զարգացման տեմպերը գոնե մասամբ այս գյուղերում ապահովելը: Իրականում դա բավական բարդ է, բայց՝ անհրաժեշտ: Տարիների մեր նպատակը հենց դա է»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
Ի տարբերություն այլ լամպերի՝ LED լամպերն առավել արդյունավետ ու դիմացկուն են, կարող են անհամեմատ ավելի երկար ծառայել՝ սպառելով 80%-ով պակաս էլեկտրաէներգիա:
ՎիվաՍել-ՄՏՍ-ը (ՄՏՍ Հայաստան ՓԲԸ) Հայաստանի շարժական կապի առաջատար օպերատորն է, որն ունի ամենաընդարձակ ցանցը և տրամադրում է ձայնային և տվյալների փոխանցման ծառայությունների բազմազան տեսականի` Հայաստանի ամբողջ տարածքում: Գործունեության հիմք ընդունելով իր բաժանորդների շահերին լավագույնս ծառայելը, հիմնադրման օրվանից` 2005թ. հուլիսի 1-ից, ՎիվաՍել-ՄՏՍ-ը կարճ ժամանակամիջոցում կարողացել է ստեղծել համահանրապետական ցանց և բաժանորդների մեծ բազա: ՎիվաՍել-ՄՏՍ-ը նորարարությունների առաջատարն է և հետամուտ է ոլորտի բոլոր զարգացումներին` ի շահ երկրի շարժական հեռահաղորդակցության շուկայի: ՎիվաՍել-ՄՏՍ-ն իր գործունեության մեջ առաջնորդվում է ISO 26000 (Սոցիալական պատասխանատվության միջազգային ստանդարտ) և ISO/IEC 27001:2013 (Տեղեկատվական անվտանգության կառավարման համակարգ) ստանդարտներով: Հավելյալ տեղեկություններ ստանալու համար այցելեք www.mts.am:-0-