ՎիվաՍել-ՄՏՍ-ի մասնագետները վարպետության դաս են վարել ՏՀՏ ուղղվածությամբ սովորողների համար
ԵՐԵՎԱՆ, 22 հունիսի. /ԱՌԿԱ/. Երևանի «Քվանտ» վարժարանի և Հայաստանի ազգային պոլիտեխնիկական համալսարանի ավագ դպրոցի սաներն այցելել են ՎիվաՍել-ՄՏՍ-ի գլխամասային գրասենյակ:
Ինչպես հայտնում է օպերատորի մամուլի ծառայությունը, շուրջ 12 տարի հեռահաղորդակցության ոլորտում առաջատարի դիրքերը չզիջող ընկերության մասնագետները վարպետության դասընթաց են վարել ՏՀՏ (Տեղեկատվական և հեռահաղորդակցության տեխնոլոգիաների) փորձարարական ուսումնական ծրագրով սովորողների համար:
Տեսական գիտելիքներ ձեռք բերած աշակերտներին փոխանցվել են նաև գործնական հմտություններ:
Տեխնիկական վարչության մասնագետը մանրամասնել է ռադիոհասանելիության ցանցերին և փոխկապակցման ենթահամակարգերին առնչվող հարցեր:
Ինտերակտիվ շփման, հարց ու պատասխանի միջոցով աշակերտներն ամրապնդել են նախորդ կիսամյակի ընթացքում «Հեռահաղորդակցության հիմունքներ» առարկայից ձեռք բերած տեսական գիտելիքները:
ՎիվաՍել-ՄՏՍ-ի մասնագետները համանման դասընթաց են կազմակերպել նաև մարզերում. ընթացիկ ամսում Գյումրիի «Ֆոտոն» վարժարանի աշակերտները եղել են Երևան-Գյումրի հատվածում տեղակայված արևային էներգիայով սնվող հիմնական երկու կայանի տարածքում:
Ընկերությունից նշում են նաև, որ Վանաձորի մաթեմատիկայի և բնագիտական առարկաների խորացված ուսուցմամբ հատուկ դպրոցի սաները եղել են Լոռու մարզում տեղակայված բազային կայաններից մեկի տարածքում:
«Աշխարհում ներկայանալի տեղ զբաղեցնելու իրատեսական և կայուն միջոցը գիտելիքն է: Երբ այդ գիտելիքը հարստանում է նաև տարիների փորձով, դառնում է կապիտալ: Հայաստանի հեռահաղորդակցության ոլորտում առաջատարի դիրքերը պահպանող ՎիվաՍել-ՄՏՍ-ն ունի հսկայական կապիտալ՝ տարիների փորձ, որի հիմքում անընդհատ կատարելագործվող մասնագետների գիտելիքն է: Որպես պատասխանատու ընկերություն, մենք ձգտում ենք չսահմանափակվել առաջատարի դիրքերը պահպանելով: Ձգտում ենք օգտակար լինել զարգացման ներուժ ունեցող երիտասարդությանը», - ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
«Հեռահաղորդակցության հիմունքներ» առարկան 2017 թվականից դասավանդվում է քառակողմ հուշագրով (ՀՀ ԿԳ նախարարություն, «Սինոփսիս Արմենիա», ՎիվաՍել-ՄՏՍ, «Յունիքոմփ») ձեռք բերված պայմանավորվածության շրջանակում՝ Գյումրու «Ֆոտոն» և Երևանի «Քվանտ» վարժարաններում, Արտաշես Շահինյանի անվան ֆիզիկամաթեմատիկական և Վանաձորի մաթեմատիկայի և բնագիտական առարկաների խորացված ուսուցմամբ հատուկ դպրոցներում, ինչպես նաև ՀԱՊՀ՝ Երևանի տարածքում գործող ավագ դպրոցում:
ՎիվաՍել-ՄՏՍ-ը («ՄՏՍ Հայաստան» ՓԲԸ) ընկերությունը հայկական շուկայում գործում է 2005 թվականից: Ընկերության բաժնետոմսերի 80 տոկոսը պատկանում է Ռուսաստանի և ԱՊՀ բջջային կապի խոշորագույն օպերատոր «Մոբիլնիե Տելեսիստեմի» ԲԲԸ-ին, մնացած 20 տոկոսը պատկանում է լիբանանյան Fattouch Group ներդրումային խմբին: -0-