Ucom ընկերությունն առաջին անգամ Հայաստանում առցանց հեռարձակում է ընդգրկել IP –հեռուստատեսությունում
ԵՐԵՎԱՆ, 21 դեկտեմբերի. /ԱՌԿԱ/. Ucom հայկական հեռուստահաղորդակցային ընկերությունը Հայաստանում IP–հեռուստատեսությամբ առցանց WebTV դիտելու հնարավորություն է ընձեռել։
Ucom հեռուստատեսային ցանցի uTV և uTV Box բաժանորդները հնարավորություն ունեն առանձին ալիքով հետևելու «Ազատություն» ռադիոկայանի առցանց հեռուստաեթերին։ «Ազատության» լրագրողների կողմից ներկայացվող տեղական և միջազգային լուրերը, օրվա կարևորագույն իրադարձությունների մասին ռեպորտաժները, մեկնաբանությունները, հարցազրույցներն այսուհետ հասանելի են Ucom ցանցում՝ 222-րդ հեռուստաալիքով։
«Հաշվի առնելով Ucom-ի տեխնիկական հնարավորությունները և մեր բաժանորդների մեծագույն հետաքրքրվածությունը հենց «Ազատության» բովանդակության նկատմամբ, այսպիսի նորարարական լուծում մտածեցինք՝ Հայաստանում առաջին անգամ ընդգրկելով առցանց հեռուստաեթերը IPTV-ում», - նշել է Ucom ընկերության համահիմնադիր և գլխավոր տնօրեն Հայկ Եսայանը։
«Ազատության» առցանց եթերը հասանելի է նաև uMediaroom շարժական հեռուստատեսության բաժանորդներին։
Ucom ընկերությունը Հայաստանում 2009թ. սկսած կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ:–0–