Ucom-ը ԵՏՄ շրջանակում ռոմինգի նոր իջեցված սակագներ է ներկայացրել

ԵՐԵՎԱՆ, 17 մայիսի. /ԱՌԿԱ/. Ucom հեռահաղորդակցական օպերատորը հայ օգտատերերին է ներկայացրել ԵՏՄ երկրների տարածքում ռոմինգում զանգերի նոր իջեցված սակագները, հաղորդել են երեքշաբթի ընկերության մամուլի ծառայությունից:

«Արդեն գործում է նոր եվրասիական ռոմինգի գոտի, որի մեջ մտնում են ԵՏՄ անդամ պետությունները (Բելառուս, Ռուսաստան, Ղրղզստան, Ղազախստան):  Այսուհետ այս գոտում գտնվող բաժանորդները կօգտվեն ռոմինգի նոր իջեցված սակագներից», - ասվում է հաղորդագրության մեջ:

Այսուհետ ռոմինգում մուտքային զանգերը, զանգերը դեպի Հայաստան և տեղական զանգերը եվրասիական գոտում կարժենան 250 դրամ/րոպե, ընդ որում, միջազգային զանգերի արժեքը կկազմի 2200 դրամ/րոպե: Ինչ վերաբերում է SMS հաղորդագրություններին, ապա դրանք հասանելի կլինեն մեկ հաղորդագրությունը 100 դրամ սակագնով, իսկ շարժական ինտերնետը` 1 ՄԲ-ը 250 դրամ սակագնով:

Ընդ որում, ընկերությունից նշել են, որ Ռուսաստանում MegaFon ընկերության հետ գործող ռոմինգի շահավետ առաջարկը կմնա անփոփոխ:

Ucom (Universal Communications) հայկական ընկերությունը հիմնադրվել է 2007 թ.–ին։ Լինելով Հայաստանի հեռահաղորդակցական շուկայի առաջատարներից մեկը` ընկերությունը տրամադրում է այդ ոլորտի ծառայությունների ողջ շրջանակը` գերարագ սիմետրիկ ինտերնետ, IP–հեռուստատեսություն, թվային հեռախոսային ծառայություններ, բջջային կապի ծառայություններ։ Ucom–ը, Ericsson ընկերության աջակցությամբ, Հայաստանում ստեղծում է նոր սերնդի խոշորագույն օպտիկամանրաթելային ցանցը։

2015 թ.–ի սեպտեմբերին Ucom–ը ձեռք բերեց Orange Armenia ընկերության (ապրանքանիշը` Orange, France Telecom–ի նախկին դուստրը) բաժնետոմսերի 100 տոկոսը, որը հայկական շուկայում գործում էր 2009 թ.–ի նոյեմբերի 5–ից։ Ընկերությունն արդեն հայտարարել է միաձուլման մասին և իրականացրել է վերաբրենդավորում։ ($1 – 478,83 դրամ)–0–