Ucom-ն առաջին անգամ Հայաստանում ներդրեց Ericsson-ի նորագույն 4G+ տեխնոլոգիան

ԵՐԵՎԱՆ, 26 սեպտեմբերի. /ԱՌԿԱ/. Սեպտեմբերի 23–ին օլիմպիական մեդալակիրներին մեծարող հատուկ միջոցառման ժամանակ օլիմպիական չեմպիոն, ըմբիշ Արթուր Ալեքսանյանն ազդարարեց այս տարվա ամենասպասված՝ 4G+ ցանցի մեկնարկը Ucom ընկերության կողմից, հաղորդում է ընկերության մամուլի ծառայությունը։  

Ericsson ընկերության ամենավերջին Ericsson Radio System ապրանքային դասի և Antenna Integrated Radio (AIR) իր տեսակի մեջ լավագույն համակարգերին դասվող գերժամանակակից բազմաչափանիշ ռադիո սարքավորումները վերջապես ներդրվեցին Երևանում:

Ucom ընկերության 4G+ կամ ժամանակակից LTE ցանցը նախատեսված է Հայաստանում տվյալների փոխանցման տրաֆիկի նկատմամբ օրեցօր աճող պահանջարկը բավարարելու, ավելի լավ որակ ու մեծ արագություններ ապահովելու և օգտագործման առավել լայն հնարավորություններ առաջարկելու համար, նշում է ընկերությունը։

Այս նորագույն տեխնոլոգիայի ներդրման ծրագրի շրջանակում նաև նախատեսվում է ներդնել Ericsson Expert Analytics ծրագրային լրակազմը, որը Ucom-ին հնարավորություն կընձեռի բարելավել բաժանորդային փորձառությունը, իրականացնել բաժանորդների գոհունակության վերաբերյալ կանխատեսումներ և անմիջապես ձեռնարկել գոհունակության մակարդակի բարելավմանն ուղղված քայլեր:

Այս համապարփակ ծրագրային լրակազմի միջոցով Ucom-ը կարող է իրական ժամանակում ստանալ վերլուծական տվյալներ, որոնք կարող են կիրառվել բաժանորդների փոփոխվող պահանջները բավարարելու և վերջիններիս գոհունակությունը խթանելու համար:

Ընկերությունը նաև նշում է, որ այս լուծումների շնորհիվ Ucom-ի 4G+ ցանցը ոչ միայն կլինի ամենաարագ գործող ցանցերից մեկն Անդրկովկասում, այլ նաև կբավարարի վերջնական օգտագործողների աճող ակնկալիքները:

Ucom-ի կողմից ներդրված այս առաջատար տեխնոլոգիան գործում է նաև հեռահաղորդակցության այնպիսի զարգացած շուկա ունեցող երկրներում, ինչպիսիք են Հյուսիսային Ամերիկան, Կորեան, Ճապոնիան, Չինաստանի որոշ շրջանները և, իհարկե, եվրոպական մի շարք երկրները:

«Հպարտ ենք ազդարարել այս մեծապես նորարարական տեխնոլոգիայի մեկնարկը Հայաստանում, որը մեր բաժանորդներին հնարավորություն կտա օգտվել մինչև 250 Մբ/վ արագությամբ լայնաշերտ ինտերնետ կապից, ինչպես անում են աշխարհի ամենաառաջատար հեռահաղորդակցության շուկաների սպառողները: Հաշվի առնելով մեր բաժանորդների օրեցօր աճող ակնկալիքները՝ այժմ մենք ուրախ ենք, որ կարող ենք նրանց առաջարկել է՛լ ավելի լավ փորձառություն և համաքայլ ընթանալ աշխարհի առաջատար ընկերությունների հետ», - նշել է Ucom ընկերության գլխավոր տնօրեն Հայկ Եսայանը:

Ծրագիրը հնարավոր եղավ իրականացնել Ericsson Nikola Tesla ընկերության աջակցությամբ:

«Հպարտ ենք, որ Ucom ընկերության հետ միասին Հայաստան ենք բերում գերժամանակակից LTE տեխնոլոգիան, որը նախկինում դեռ ներդրված չի եղել տեղական շուկայում: Այս տեխնոլոգիայի ներդրմամբ Ericsson և Ucom ընկերությունները կընդլայնեն շարժական լայնաշերտ ինտերնետ կապի ծածկույթը Հայաստանում և արագ ու հուսալի ինտերնետ կապի ծառայություններ կմատուցեն ավելի մեծ թվով բաժանորդների: Սա կարևոր քայլ էր մեզ համար Հայաստանում, և մենք ուրախ կլինենք շարունակել աջակցել հայկական շարժական կապի շուկայի հետագա զարգացմանը», - նշել է Ericsson Nikola Tesla ընկերության նախագահ Գորդանա Կովաչևիչը:

Լինելով LTE ցանցի համաշխարհային առաջատարը՝ Ericsson ընկերությունը, Ucom-ի բաժանորդներին առաջարկում է 4G+ ցանցի միջոցով մատուցվող ամենաբարձր որակի ծառայություններից օգտվելու հնարավորություն:

Այսպիսի հնարավորություն Ericsson-ն ընձեռում է շնորհիվ իր փորձագիտական մեծ թիմի և միջազգային լայն փորձի (ավելի քան 200 LTE RAN ծառայությունների մատուցման պայմանագրեր շուրջ 100 երկրներում, գործող ավելի քան 500,000 բազային ռադիոկայաններ):

Ericsson-ը ներկա է տրաֆիկի բարձր սպառում ունեցող բոլոր երկրներում, այդ թվում՝ ԱՄՆ-ում, Ճապոնիայում և Հարավային Կորեայում, և LTE տեխնոլոգիաներ է մատակարարում աշխարհի տասը խոշորագույն բջջային օպերատորներից ինին (CMCC, Verizon, AT&T, CT China, Softbank, Sprint, T-Mobile, KDDI, SKT):

Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։ 2015 թ.–ի սեպտեմբերին Ucom–ը ձեռք բերեց Orange Armenia ընկերության (ապրանքանիշը` Orange, France Telecom–ի նախկին դուստրը) բաժնետոմսերի 100 տոկոսը, որը հայկական շուկայում գործում էր 2009 թ.–ի նոյեմբերի 5–ից։ Ընկերությունն արդեն հայտարարել է միաձուլման մասին և իրականացրել է վերաբրենդավորում։-0-