Ucom ընկերությունը նորարարական լուծումներ է ներկայացրել DigiTec-2016 ցուցահանդեսի շրջանակում

ԵՐԵՎԱՆ, 30 սեպտեմբերի. /ԱՌԿԱ/. Ucom հայկական հեռահաղորդակցական ընկերությունն ուրբաթ ներկայացրել է իր նորարարական լուծումները Երևանում անցկացվող DigiTec-2016 տեխնոլոգիական ցուցահանդեսի շրջանակում։

«Արդեն մի քանի օր է` մենք խոսում ենք մեր նոր 4G+ ցանցի մասին։ Այն մեզ համար ամենակարևոր և սպասված ցանցն է։ Մինչև 250 Մբ/վ արագությունը, որը այսօր ներկայացրեցինք, ակտուալ է մեր երկրի համար։ Այս ցանցը միակն է ոչ միայն Հայաստանում, այլ նաև տարածաշրջանում», – լրագրողներին ասաց Ucom ընկերության գլխավոր տնօրեն Հայկ Եսայանը։

4G+ կամ ժամանակակից LTE ցանցը նախատեսված է Հայաստանում տվյալների փոխանցման տրաֆիկի նկատմամբ օրեցօր աճող պահանջարկը բավարարելու, ավելի լավ որակ ու մեծ արագություններ ապահովելու և օգտագործման առավել լայն հնարավորություններ առաջարկելու համար։ Այս նորագույն տեխնոլոգիայի ներդրման ծրագրի շրջանակում նաև նախատեսվում է ներդնել Ericsson Expert Analytics ծրագրային լրակազմը, որը Ucom-ին հնարավորություն կընձեռի բարելավել բաժանորդային փորձառությունը, իրականացնել բաժանորդների գոհունակության վերաբերյալ կանխատեսումներ և անմիջապես ձեռնարկել գոհունակության մակարդակի բարելավմանն ուղղված քայլեր:

Բացի այդ, Ucom–ը ներկայացրել է Armenia Premium հեռուստաալիքի չորս նոր նախագծերը, որոք կարող են դիտել միայն Ucom–ի բաժանորդները` երկու նոր սիթքոմ, մեկ ռեալիթի շոու և պատմական հեռուստասերիալ։ Հաղորդումները հասանելի կլինեն հոկտեմբերի 31–ից։

«Շուտով մեր բաժանորդները հնարավորություն կստանան օգտվել YouTube–ից հեռուստացույցի միջոցով, ինչպես նաև օգտվել U!Drive նոր ծառայությունից, որը, կարծում եմ, հասանելի կլինի մինչև տարեվերջ», – ասաց Եսայանը։

U!Drive–ն անձնական վիրտուալ ամպ է, որն ապահովում է հասանելիություն օգտատիրոջ էլեկտրոնային արխիվի նկատմամբ։

Ucom–ի բաժանորդները շուտով հնարավորություն կստանան հեռուստաալիքների ծրագրերը դիտել սմարթֆոնի միջոցով հատուկ հավելվածի օգնությամբ և հեռախոսն օգտագործել հեռուստացույցի հեռակառավարման վահանակի փոխարեն։

Ucom ընկերության նորարարությունների թվում ներկայացվել է նաև U!Pay վիրտուալ վճարային համակարգը։ Նախագիծն իրականացվում է Idram ընկերության հետ համատեղ։

DigiTec-2016 ամենամյա միջազգային 12–րդ տեխնոլոգիական ցուցահանդեսը ուրբաթ մեկնարկել է Երևանում «Տոն տեխնոլոգիական հայության համար» նշանաբանի ներքո։

Ցուցահանդեսը կտևի մինչև հոկտեմբերի 2–ը։ Այն անցկացվում է ՀՀ կառավարության աջակցությամբ։ Պլատինե հովանավորն է Ucom ընկերությունը։

Ucom (Universal Communications) ընկերությունը հիմնադրվել է 2007 թ.–ին և զբաղվում է հեռահաղորդակցական ծառայությունների տրամադրմամբ։ Ericsson–ի աջակցությամբ ընկերությունը ստեղծել է լայնաշերտ հասանելիության ցանց` տրամադրելով ինտերնետային, IP հեռուստատեսության և ֆիքսված հեռախոսակապի ծառայություններ։ 2015 թ.–ի սեպտեմբերին Ucom–ը ձեռք բերեց Orange Armenia ընկերության (ապրանքանիշը` Orange, France Telecom–ի նախկին դուստրը) բաժնետոմսերի 100 տոկոսը, որը հայկական շուկայում գործում էր 2009 թ.–ի նոյեմբերի 5–ից։ Ընկերությունն արդեն հայտարարել է միաձուլման մասին և իրականացրել է վերաբրենդավորում։-0-