Հայաստանի հաջողությունը ՏՀՏ ոլորտում պայմանավորված է էլեկտրոնային կառավարման գործիքների կիրառմամբ. UITE
ԵՐԵՎԱՆ, 17 ապրիլի. /ԱՌԿԱ/. Հայաստանի հաջողությունը տեղեկատվական–հաղորդակցական տեխնոլոգիաների ոլորտում պայմանավորված է էլեկտրոնային կառավարման գործիքների կիրառմամբ, ասաց Ինֆորմացիոն տեխնոլոգիաների ձեռնարկությունների միության գործադիր տնօրենի տեղակալ Հայկ Չոբանյանն «ԱՌԿԱ» գործակալությանը` մեկնաբանելով երկրի ցանցային պատրաստության ցուցիչի աճը։
Հայաստանը 2015 թվականին բարձրացրել է Ցանցային պատրաստվածության ցուցիչում իր ցուցանիշը յոթ կետով և զբաղեցրել է 58–րդ տեղը 143 երկրների շրջանում, նշված է Համաշխարհային տնտեսական համաժողովի Տեղեկատվական տեխնոլոգիաների 2015թ.–ի համաշխարհային զեկույցում, որը ներկայացրել է «Տնտեսություն և արժեքներ» հետազոտական կենտրոնը։
Ցանցային պատրաստվածության ցուցիչի աճով Հայաստանն առաջատար է աշխարհում` իր դիրքերը 2012-2016 թվականին բարելավելով 36 կետով։
«Վերջին տարիներին Հայաստանում մեծ թվով գործարար միջոցառումներ են անցկացվում, որոնց մի մասը կապված է ՏՀՏ ոլորտի հետ, որտեղ նաև, ինչպես բիզնես միջավայրում, էլեկտրոնային կառավարման գործիքները կարևոր տեղ են զբաղեցնում»,– ընդգծեց Չոբանյանը։
Չոբանյանը նշեց, որ երկրում շոշափելի առաջընթաց է նկատվում, մասնավորապես, նոր ձեռնարկությունների էլեկտրոնային գրանցման ոլորտում, ինչը թույլ է տալիս իրավաբանական անձանց առցանց ռեժիմով ընկերություններ գրանցել։
«Առաջընթաց կա նաև հարկային վարչարարության մասով, որտեղ էլեկտրոնային հաշվետվությունների համակարգեր են կիրառվում, որոնք բացակայում են մի շարք զարգացած երկրներում, ինչը նույնպես ազդում է երկրի վարկանիշերի վրա»,– նշեց Չոբանյանը։
ԵՏՄ–ին Հայաստանի անդամակցության համատեքստում, Չոբանյանի խոսքով, որոշ դժվարություններ են առաջացել տարբեր ուղղություններով, մասնավորապես, մաքսային վերահսկման նոր մեխանիզմների ներդրմամբ, ինչը կարող է Հայաստանում տարբեր ցուցանիշների հետընթացի պատճառ դառնալ։
Նա այդ իմաստով պարզաբանեց, որ հետընթացից խուսափելու համար հայկական կառավարությունը և բիզնեսի ներկայացուցիչները սերտորեն պետք է աշխատեն։
Զեկույցի համաձայն` նախորդ տարվա համեմատ բոլոր չորս չափանիշներով աճ է գրանցվել` քաղաքական, շուկայական և ենթակառուցվածքային միջավայրի մակարդակ, քաղաքացիների, բիզնեսի և կառավարության` տեխնոլոգիաների կիրառման պատրաստվածության մակարդակ, ՏՏ գործնական կիրառում և դրանց ազդեցությունը, որոնցից յուրաքանչյուրում Հայաստանի դիրքերը բարձրացել են 5-13 կետով` միաժամանակ ցուցանիշի էական բարելավում է գրանցվել ազդեցության բաղադրիչի մասով` 13 կետով։
Յուրաքանչյուր երկիր գնահատվում է մի շարք չափանիշներով, որոնց հիման վրա հաշվարկվել է «ցանցային պատրաստվածության» ցուցիչը։ Այն հիմնված է ընդհանուր վիճակագրական տվյալների և ընկերությունների ղեկավարների հարցման արդյունքների համադրման վրա։ -0-