ՏՀՏ ոլորտի առաջնորդների «առանց փողկապի հանդիպումը» կանցկացվի Աղվերանում

ԵՐԵՎԱՆ, 23 փետրվարի. /ԱՌԿԱ/. Տեղեկատվական և հաղորդակցական տեխնոլոգիաների ոլորտի առաջնորդների «առանց փողկապների հանդիպումը» տեղի կկայանա փետրվարի 25-26-ը Աղվերանում, «ԱՌԿԱ» գործակալությանը հաղորդեցին Ինֆորմացիոն տեխնոլոգիաների ձեռնարկությունների միությունից (UITE):

Ֆորումին կմասնակցեն ներկայացուցիչներ ՀՀ էկոնոմիկայի, տրանսպորտի և կապի, ՀՀ տարածքային կառավարման, ՀՀ քաղաքաշինության, ֆինանսների նախարարություններից, ՀՀ տնտեսական մրցակցության Պաշտպանության պետական հանձնաժողովից, ՀՀ հանրային ծառայությունները կարգավորող հանձնաժողովից, Երևանի քաղաքապետարանից, ՀՀ ԿԱ անշարժ գույքի կադաստրի պետական կոմիտեից, ինչպես նաև տեղեկատվական և հեռահաղորդակցության ոլորտներում գործող ընկերություններից:

Հանդիպում-ֆորումի օրակարգում ներառված թեմաներից են՝ ՀՀ հեռահաղորդակցության ոլորտի զարգացման ռազմավարություն. խնդիրներ և հնարավորությունները, Հեռահաղորդակցության ոլորտի հանրային ծառայությունների կարգավորման խնդիրները և միջնաժամկետ նպատակները, Ենթակառուցվածքների համատեղ օգտագործում` Վիրտուալ օպերատորներ, Համարների տեղափոխելիություն, Ունիվերսալ ծառայություններ, Հեռահաղորդակցության ենթակառուցվածքների զարգացման հնարավորություններ. մայրուղիներից մինչև տանիքներ, Համայնքների ռազմավարական զարգացման նախագծերում հեռահաղորդակցության ենթակառուցվածքների ներառման հնարավորություններ, Հեռահաղորդակցության ոլորտի տենդերներ. թափանցիկություն,  անկողմնակալություն և արհեստավարժություն` Տենդերների նախապատրաստման աշխատանքներ, Տենդերների առցանց իրականացում, Տենդերների բողոքարկում, Ոլորտային միությունների ներկայացուցիչների ներգրավման հնարավորություններ:

«ՏՀՏ լիդերների հանդիպում» ֆորումը կազմակերպվում է 2007թ.-ից Ինֆորմացիոն տեխնոլոգիաների ձեռնարկությունների միության կողմից:

Միջոցառման նպատակն է մեկ վայրում հավաքել մասնավոր և պետական հատվածների ներկայացուցիչներին և ոչ ֆորմալ մթնոլորտում քննարկել ՏՀՏ ոլորտին առնչվող առաջնային խնդիրները: -0-