Շիրակի մոտ 90 երեխա տեխնոլոգիական կրթություն է ստացել «Փոփոխություններ կրթության միջոցով» ծրագրի շրջանակում
ԵՐԵՎԱՆ, 2 մայիսի. /ԱՌԿԱ/. Շիրակի մարզի հաշմանդամների և սոցիալապես անապահով ընտանիքների մոտ 90 երեխա «Փոփոխություններ կրթության միջոցով» ծրագրի շրջանակում ստացել է տեխնոլոգիական կրթություն, հաղորդում է «Ձեռնարկությունների ինկուբատոր» հիմնադրամի մամուլի ծառայությունը:
«Ձեռնարկությունների ինկուբատոր» հիմնադրամը «Փոփոխություններ կրթության միջոցով» ծրագիրն իրականացրել է Գյումրու տեխնոլոգիական կենտրոնի շրջանակում: Ծրագիրն ուղղված էր Շիրակի մարզի հաշմանդամների և սոցիալապես անապահով ընտանիքների երեխաների համար որակյալ կրթություն ստանալու հավասար պայմանների ապահովմանը:
Ծրագիրը մեկնարկել է 2015 թ.-ի նոյեմբերին և ավարտվել 2016 թ.-ի մարտին: Ծրագրին մասնակցել են Շիրակի մարզի Գյումրի և Մարալիկ քաղաքների, Ձորակապ, Լանջիկ, Գուսանագյուղ, Հոռոմ և Հովունի գյուղերից 90 երիտասարդ:
Հինգ ամսվա ընթացքում նրանք ուսումնասիրել են գրաֆիկական դիզայն` Photoshop և Corel Draw ծրագրերի միջոցով: Բացի այդ, անցկացվել են սոցիալական ինտեգրման դասընթացներ, որոնց շնորհիվ մասնակիցները ձեռք են բերել մարդու իրավունքների սոցիալական հարցերի վերաբերյալ գիտելիքներ: Միջոցառման արդյունքում մասնակիցներին շնորհվել են հավաստագրեր:
Ծրագրի իրականացմանն աջակցել է Հայաստանում ԱՄՆ դեսպանատունը: -0-