Beeline-ը պարգևատրել է հաճախորդային սպասարկման բարելավման նախագծի ամենաակտիվ բաժանորդներին

ԵՐԵՎԱՆ, 17 հուլիսի, /ԱՌԿԱ/. «ԱրմենՏել» ընկերությունը (Beeline ապրանքանիշ)  պարգևատրեց Հաճախորդների սպասարկման որակի բարելավման ծրագրի շրջանակում SMS-հարցմանը մասնակցած երեք բաժանորդների, հայտնում է ընկերության մամուլի ծառայությունը։

Այդ հաճախորդները, մասնավորապես, առաջինն էին շնորհակալություն հայտնել ընկերությանը` հաշվեկշռի լիցքավորման վավերականության ժամկետը վերացնելու համար:

Պարգևատրման արարողությունը տեղի ունեցավ Ազատության 24 հասցեում գտնվող  Beeline վաճառքի և սպասարկման գրասենյակում, որտեղ ընկերության Գլխավոր տնօրեն Անդրեյ Պյատախինը երևանաբնակ Աննա Հակոբյանին և Սերգեյ Հովհաննիսյանին և Արմավիրից Անի Մինասյանին հանձնեց հատուկ մրցանակներ` Beeline Smart Duo մոդելի սմարթֆոններ:

«Այս պահին Beeline-ը Հայաստանում միակ օպերատորն է, որի բաժանորդները ստիպված չեն մտածել լիցքավորման ժամկետների մասին։ Կարճ ժամանակահատվածում մենք ստացել ենք բազմաթիվ շնորհակալական խոսքեր Հայաստանի հեռահաղորդակցության շուկայում այս աննախադեպ փոփոխության համար»,– ասաց նա։

Պյատախինն ավելացրեց, որ Beeline բաժանորդները կարող են օգտագործել բջջային հաշվեկշռին փոխանցված միջոցները այն ժամանակ, երբ կցանկանան, քանի որ այդ գումարները «չեն վառվում» և «չեն սառեցվում»։

«Հավատարիմ մնալով հաճախորդամետ այս ռազմավարությանը` Beeline-ը հետագայում ևս կշարունակի անակնկալներ մատուցել բաժանորդներին, ովքեր մշտապես մեր կողքին են և օգնում են դարձնել ծառայությունները հնարավորինս պարզ և հարմար», - նշեց Պյատախինը:

Հաշվեկշռի լիցքավորման վավերականության ժամկետի վերացման մասին ընկերությունը հայտարարել էր 2014 թ. փետրվարին: Բջջային հեռախոսի հաշվեկշիռը ցանկացած չափով և ցանկացած եղանակով լիցքավորելու դեպքում (օրինակ՝ «Հաշվեկշռի փոխանցում», վճարման քարտերի կամ վճարումների ընդունման տերմինալների օգնությամբ) Beeline բաժանորդները կարող են օգտագործել հաշվեկշռին կուտակված միջոցները բաժանորդի պայմանագրի գործունեության ողջ ընթացքում:

Հաճախորդների սպասարկման որակի բարելավման ռազմավարությունը Beeline-ը որդեգրել է դեռևս 2013 թվականի աշնանը և արդեն իսկ իրականացրել է մի շարք ծրագրեր, այդ թվում` SMS հաղորդագրության միջոցով իրականացվող հարցումները։ Ցանկացած բաժանորդ, ով կատարում է գործարք Beeline վաճառքի և սպասարկման գրասենյակներում կամ զանգահարում  Հաճախորդների սպասարկման կենտրոն, ստանում է SMS հաղորդագրություն, որտեղ բաժանորդը 0-ից 10 բալանոց սանդղակով գնահատում է մեր ծառայությունները, սպասարկող աշխատակազմի բարեհամբուրությունը։ Այնուհետև այդ տեղեկատվությունը համակարգվում է ինչպես բաժանորդների հետ հետադարձ կապի և անհատական խնդիրների լուծման, այնպես էլ կազմակերպության ընդհանուր բարելավման նպատակով:

«ԱրմենՏել» ՓԲԸ-ն (Beeline ապրանքանիշ) հանդիսանում է «ՎիմպելԿոմ» ընկերությունների խմբի մի մասը, իսկ  2007 թվականի ապրիլից «ԱրմենՏելի» բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» մատուցում է ֆիքսված (մոտ 650 հազար բաժանորդ) և բջջային կապի ծառայություններ (ավելի քան 780 հազ. բաժանորդ)։
-0-