Orange Armenia–ի բաժանորդները կարող են կուտակել կանխավճարային բջջային քարտի լիցքավորման ժամկետները
ԵՐԵՎԱՆ, 15 մայիսի. /ԱՌԿԱ/. Orange-ի կանխավճարային բաժանորդները հաշիվը լիցքավորելիս կկարողանան կուտակել վավերականությունը, հինգշաբթի ասաց ընկերության գլխավոր տնօրեն Ֆրանսիս Ժելիբտերը։
Ըստ նրա, այսուհետ Orange-ի կանխավճարային բաժանորդները հաշիվը լիցքավորելիս կկարողանան կուտակել վավերականությունը՝ միևնույն ժամանակ վստահ լինելով, որ իրենց հաշվին մնացած գումարները չեն «վառվի»:
Նա նշեց, որ հաշվի յուրաքանչյուր լիցքավորումը կավելացնի օրերի որոշակի քանակ, որոնց ընթացքում բաժանորդները կկարողանան ակտիվորեն օգտագործել իրենց քարտերը։
Միաժամանակ Ժելիբտերը պարզաբանեց, որ որքան մեծ է լիցքավորված գումարը, այնքան ավելի շատ կավելանա քարտի վավերականությունը: Բաժանորդները հնարավորություն կունենան նաև պահպանել ու վերականգնել իրենց հաշվին մնացած գումարը՝ նույնիսկ լիցքավորման վավերականության ժամկետի ավարտից հետո:
«Ուրախ ենք այսպիսի դրական նորություններ ներկայացնել մեր կանխավճարային բաժանորդներին: Այսօր արդեն նրանք հնարավորություն ունեն կուտակել իրենց քարտերի վավերականության ժամկետը՝ միևնույն ժամանակ պահպանելով հաշվին մնացած գումարները: Հավատացած ենք, որ սա մեր բաժանորդների համար, ովքեր հատկապես սիրում են օգտվել Orange ծառայություններից, կստեղծի ավելի հարմար ու ճկուն պայմաններ՝ իրենց հաշիվը կառավարելու համար»,– ասաց Ժելիբտերը։
Ֆրանս Տելեկոմ Խմբի անդամ Օրանժ Արմենիան Հայաստանում շարժական հեռախոսակապի և ինտերնետի ծառայություններ է մատուցում 2009թ. նոյեմբերի 5-ից: Ընկերությունը Հայաստանում մինչ օրս կատարել է մոտ 250 միլիոն եվրոյի ներդրում (ներառյալ` լիցենզիայի ձեռքբերման համար) և արդեն ապահովում է բջջային կապի ու լայնաշերտ շարժական ինտերնետի հասանելիությունը Հայաստանի 600 քաղաքներում և գյուղերում` բնակչության ավելի քան 95% տոկոսին: --0—