Orange Armenia ընկերությունը գործարկեց վաճառքի նոր սրահի բացումը «Երևան Մոլ» առևտրի կենտրոնում

ԵՐԵՎԱՆ, 10 մարտի. /ԱՌԿԱ/. Orange Armenia ընկերությունը հայտարարեց իր 78-րդ վաճառքի սրահի բացումը «Երևան Մոլ» առևտրի կենտրոնում, հայտնեցին ընկերության մամուլի ծառայությունից։

Orange-ի նորաբաց խանութում ներկայացված է Orange առաջարկների և ծառայությունների ամբողջական փաթեթը, ինչպես նաև` հեռախոսասարքերի լայն տեսականին: Պաշտոնական բացումը տեղի ունեցավ մարտի 8-ին։

«Այժմ մենք արդեն գործում ենք մայրաքաղաքի երկու խոշոր առևտրի ու զվարճանքի կենտրոններում և շարունակում ենք Orange-ի ծառայություններն առավել հասանելի դարձնել մեր առկա և նոր բաժանորդների համար, ինչպես Երևանի, այնպես էլ մարզերի բոլոր հարմարավետ վայրերում», - ասաց Օրանժ Արմենիայի գլխավոր տնօրեն Ֆրանսիս Ժելիբտերը վաճառքի սրահի պաշտոնական բացման արարողության ժամանակ:    

Ինչպես նշեց Օրանժ Արմենիայի Վաճառքի տնօրեն Արսեն Հովհաննիսյանը, նորաբաց վաճառքի սրահն ունի հատուկ մի անկյուն, որտեղ ներկայացված է սմարթֆոնների և հեռախոսների լայն տեսականի` հատկապես այն 5000 հաջողակների համար, ովքեր կհասցնեն օգտվել Orange-ի կողմից վերջերս ներկայացված գարնանային  հատուկ առաջարկից։
 
Հիշեցնենք, որ Orange-ի գարնանային հատուկ առաջարկի շրջանակներում Orange-ի ամսական բաժանորդագրություններին բաժանորդագրվելիս առաջին 5000 նոր բաժանորդները ոչ միայն կստանան իրենց նախընտրած հեռախոսը հատուկ գնով, այլ նաև մեկ այլ հեռախոս որպես նվեր, ինչպես նաև իրար հետ անվճար խոսելու հնարավորություն:

«Orange Armenia»–ն France Telecom (Orange ապրանքանիշ) ընկերության 100%–նոց դուստրն է, հայկական շուկա է մտել 2009 թվականի նոյեմբերի 5–ին` ապահովելով ցանցի 95–տոկոսանոց ծածկույթ և բջջային ցանցի ու Ինտերնետի հասանելիություն հանրապետության 600 համայնքներում (քաղաքներում և գյուղերում)։-0-