Microsoft-ն ավարտել է LinkedIn-ի գնման գործարքը
ԵՐԵՎԱՆ, 9 դեկտեմբերի. /ԱՌԿԱ/. Microsoft ընկերությունն ավարտել է 26,2 մլրդ դոլարով LinkedIn սոցիալական ցանցի գնման գործարքը, հաղորդում է Vestifinance.ru-ն` հղում անելով սոցիալական ցանցի Twitter-ի պաշտոնական էջին:
LinkedIn-ի գործադիր տնօրեն Ջեֆ Վայների խոսքով, ընկերությունների միավորումը կարագացնի «ողջ աշխարհում պրոֆեսիոնալների կապը և նրանց առավել արդյունավետ և հաջողակ կդարձնի»: Նա ավելացրել է, որ ուշադրության կենտրոնում է մնում սոցիալական ցանցի և օգտատերերի համար դրա նշանակության զարգացումը:
Microsoft-ի ղեկավար Սատյա Նադելան իր հերթին նշել է, որ չափազանց դրական է տրամադրված երկու ընկերությունների ընդհանուր ապագայի հարցում: Նա ընդգծեց, որ LinkedIn-ի գնումից հետո Microsoft-ի համար առաջնայինը կդառնա սոցիալական ցանցի «ցուցանիշների աճի արագացումը»: «Ես լավատեսորեն եմ տրամադրված այն հարցում, թե ինչի կկարողանանք հասնել միասին», - ասել է Նադելան:
Ջեֆ Վայները խոստացել է ավելի շատ մանրամասներ ներկայացրել Microsoft-ի և LinkedIn-ի ինտեգրման վերաբերյալ: Սոցիալական ցանցում սպասվող փոփոխությունների թվում կլինի Outlook փոստային հաճախորդի և Microsoft փաթեթի հետ աշխատանքի ժամանակ LinkedIn-ի ըքաունթի կիրառումը: Բացի այդ, LinkedIn-ի ծանուցումները կներառվեն Windows-ի ծանուցումների կենտրոնում, իսկ օգտատերերը հնարավորություն կունենան թարմացնել իրենց էջերը Word-ի տեքստային խմբագրի միջոցով:
ԱՄՆ-ում ծրագրային ապահովման խոշորագույն արտադրողը հունիսին պայմանավորվել էր գնել LinkedIn սոցիալական ցանցը 26 մլրդ դոլարով` Microsoft-ի գործադիր տնօրեն Սատյա Նադելայի` աճի ակտիվացման ջանքերի շրջանակում: Դրա համար ժամանակին թողարկվել են նաև 19,75 մլրդ դրամի պարտատոմսեր` մարման յոթ ժամկետներով:
Միաձուլման շնորհիվ, որը խոշորագույնը կդառնա Microsoft-ի պատմության մեջ, ընկերությունը նախատեսում է ընդլայնել բիզնեսին տրամադրվող ծառայությունների հավաքածուն: Մասնավորապես, սոցիալական ցանցի հետ ինտեգրման հաշվին, կարող է ընդլայնվել Office-ի գործառույթները` բանակցային գործընկերների և հաղորդագրությունների մասին տեղեկատվության գծով:
LinkedIn-ի գնումը դարձել է Microsoft-ի ներկայիս ղեկավար Սատյա Նադելայի խոշորագույն գործարքը, ով ընկերության գործադիր տնօրեն է դարձել 2014 թ.-ին: Ընկերության խոշորագույն գործարքներում երկրորդ տեղն է զբաղեցնում Skype-ի գնումը 2011 թ.-ին` 8,5 մլրդ դոլարով:
LinkedIn-ը և դրա բաժնետերերը 2011 թ.-ին IPO-ի ժամանակ ներգրավել են 352,8 մլն դոլար` տեղաբաշխելով 7,84 մլն բաժնետոմս: Առուվաճառքի առաջին իսկ օրը գնանշումներն աճել են 91 տոկոսով: Դրանից հետո LinkedIn-ի հայտնի վենչուրային ներդրող և մինորիտար բաժնետեր Պիտեր Տիլը մեղադրեց IPO-ի կազմակերպիչներին նրանում, որ վերջիններս թերագնահատել են ընկերությունը:
LinkedIn-ն առաջարկում է հավաքագրման ծառայություններ, ինչն ապահովում է ցանցի եկամուտների մեծ մասը, որը 2015 թ.-ին կազմել է գրեթե 3 մլրդ: Միաժամանակ, ընկերությունը շարունակում է վնասաբեր մնալ:
Նոյեմբերին սոցիալական ցանցն արգելափակվել էր Ռուսաստանում, այն բանից հետո, ինչ չտեղափոխեց ռուս օգտատերերի անհատական տվյալների պահպանման սերվերները ՌԴ տարածք, ինչը պահանջվում է նոր օրենսդրությամբ: -0-