Իր պարտականություններն Անդրեյ Պյատախինը կստանձնի 2013 թվականի հունիսից
ԵՐԵՎԱՆ, 8 մայիսի. /ԱՌԿԱ/. «ՎիմպելԿոմ» ընկերությունների խումբը` ի դեմս իր «ԱՊՀ» բիզնես միավորի, հայտարարում է, որ «ՎիմպելԿոմ» ընկերությունների խմբի մասը կազմող «ԱրմենՏել» ընկերության (ապրանքանիշը Beeline) գլխավոր տնօրենի պաշտոնում նշանակվել է Անդրեյ Պյատախինը: Իր պարտականություններն Անդրեյ Պյատախինը կստանձնի 2013 թվականի հունիս ամսից, հաղորդում է ընկերության մամուլի ծառայությունը։
«Մենք ուրախ ենք, որ Անդրեյը որոշում ընդունեց գլխավորել «ՎիմպելԿոմ»-ի դուստր ձեռնարկությունը Հայաստանում: Մեր ընկերությունում նա 12 տարի շարունակ աշխատել է տարբեր պաշտոններում, և նրա ղեկավարած բոլոր ուղղություններում մեծ հաջողություններ են գրանցվել: Համոզված եմ, որ «ԱրմենՏել» ընկերության թիմում նման լուրջ համալրումը կօգնի տեղական բիզնեսին բարելավել իր դիրքերը»,– մեկնաբանելով նշանակումն` ասել է «ՎիմպելԿոմ Լտդ.» ընկերության ԱՊՀ երկրներում բիզնեսի զարգացման գծով փոխնախագահ Դմիտրի Կռոմսկին։
Անդրեյ Պյատախինը նշել է, որ «ՎիմպելԿոմ» ընկերությունը յուրահատուկ է այնքանով, որ յուրաքանչյուր աշխատակցի ընձեռում է զարգացման և աճի հնարավորություն, ինչպես նաև թույլ է տալիս աշխատել տարբեր երկրների շուկաներում:
«Հայաստանում գործի անցնելն ինձ համար կարևոր փուլ է իմ աշխատանքային կարիերայում և նոր փորձ ձեռք բերելու հնարավորություն: Իմ հերթին ես «ԱրմենՏել» ընկերությունում կներդնեմ երկար տարիների ընթացքում կուտակած փորձը, ներկայումս արդի նորարարական լուծումներ, ինչպես նաև կփորձեմ առավելագույն ուշադրության արժանացնել ընկերության բաժանորդների սպասարկման որակը»,– ասել է նա։
2013 թ. հունվարից «ԱրմեՏել» ՓԲԸ տնօրենի ժամանակավոր պաշտոնակատարն էր ընկերության ֆինանսական տնօրեն Կարեն Շախնազարյանը
Անդրեյը ծնվել է 1975թ. սեպտեմբերի 5-ին Լիպեցկում: 1997թ. ավարտել է Լիպեցկի պետական տեխնիկական համալսարանը: 2006 թվականին պաշտպանել է թեկնածուական դիսերտացիա «Էկոլոգիա-տնտեսական մեթոդներով մետաղագործական հիմնարկությունների արտադրանքի առաքման արդյունավետության բարձրացման ուղղված» թեմայով: 2007թ. մենեջմենթ մասնագիտությամբ ստացել է բիզնեսի կառավարման մագիստրոսի (MBA) աստիճան Ամերիկյան համալսարանից:
Հեռահաղորդակցության ոլորտում Անդրեյի մասնագիտական ուղին սկսել է 1996 թվականից: 4 տարվա ընթացքում նա անցել է մարքեթինգի բաժնի մասնագետից մինչև Լիպեցկի մասնաճյուղի «Չեռնոզոմեեի բջջային կապի» (ТМ «Сотел») փոխտնօրենի ուղին:
2001 թվականին Անդրեյը աշխատանքի է անցել «ՎիմպելԿոմ»-ում` որպես Լիպեցկի մասնաճյուղի կոմերցիոն տնօրեն, իսկ 2004 թվականից սկսել է աշխատել Ուրալի շրջանի կոմերցիոն տնօրենի պաշտոնում: 2005 թվականին Անդրեյն արժանացել է «Ադամանդե մեղու»` «ՎիմպելԿոմ»-ի բարձրագույն կորպորատիվ պարգևին: 2006 թվականից Անդրեյը պատասխանատու էր Մոսկովյան տարածաշրջանի, իսկ այնուհետև ողջ բիզնես միավորի կորպորատիվ վաճառքների համար: «ՎիմպելԿոմ»-ի և «Գոլդեն Տելեկոմ»-ի միավորումից հետո, Անդրեյը նշանակվել է Ռուսաստանի շրջաններում կորպորատիվ բիզնեսի զարգացման գծով տնօրեն: 2009 թվականից ղեկավարում է Beeline Վրաստանում, իսկ 2011 թվականից ի վեր նշանակվել է մոսկովյան տարածաշրջանի փոխնախագահի և տարածաշրջանային տնօրենի պաշտոնում:
«ԱրմենՏել» ՓԲԸ-ն (Beeline ապրանքանիշ) հանդիսանում է «ՎիմպելԿոմ» ընկերությունների խմբի մի մասը: «ՎիմպելԿոմը» հանդիսանում է աշխարհի խոշորագույն ինտեգրված օպերատորներից մեկը, որն ընդգրկում է մի շարք հեռահաղորդակցության ընկերություններ, որոնք մատուցում են ինչպես անլար և ամրակցված կապի տեխնոլոգիաների լայն շրջանակի վրա հիմնված ձայնային կապի ու տվյալների հաղորդման, այնպես էլ լայնաշերտ ինտերնետ հասանելիության ծառայություններ։ -0-