«ԱրմենՏելը» նվազեցնում է ինտերնետի գները բջջային ցանցի բաժանորդների համար
ԵՐԵՎԱՆ, 10 ապրիլի. /ԱՌԿԱ/. «ԱրմենՏել» ՓԲԸ-ն (ապրանքանիշը Beeline) երեքշաբթի հայտարարել է ինտերնետի գնի իջեցման մասին` բջջային ցանցի բաժանորդների համար ներդնելով «Ինտերնետ փաթեթներ» նոր ծառայությունը:
Ինչպես «ԱՌԿԱ» գործակալությանը հայտնեցին ընկերության մամուլի ծառայությունից, «Ինտերնետ փաթեթներ» ծառայությունը հնարավորություն է ընձեռում Beeline բջջային ցանցի բաժանորդներին ուղարկել և ստանալ ինտերնետ տրաֆիկի որոշակի քանակություն` վճարելով ֆիքսված գումար:
Այսպես, 10ՄԲ ծավալով «Մինի ինտերնետ փաթեթի արժեքը 200 դրամ է, իսկ «Միդի», «Մաքսի» և «Սուպեր Մաքսի» փաթեթները, որոնք ներառում են 50ՄԲ, 100ՄԲ և 300ՄԲ՝ համապատասխանաբար արժեն 600 դրամ, 900 դրամ և 1500 դրամ:
«Հայաստանում օրեցօր աճում է սմարթֆոներից և զանազան ինտերնետ ծրագրերով աշխատող բջջային հեռախոսներից օգտվողների թիվը: Նոր տեխնոլոգիաների առավելություններն ակնհայտ են, իսկ «ԱրմենՏել» ընկերությունը հեռու չի մնում բջջային կապի ոլորտի նոր զարգացումներից: Այսուհետ մեր բաժանորդները, կախված իրենց կողմից օգտագործաված տրաֆիկից, կարող են միանալ այս կամ այն փաթեթին և օգտագործել իրենց հեռախոսի հնարավորությունները`չհաշվելով մեգաբայթերն ու չմտածելով հավելյալ վճարումների մասին», - մամուլի ծառայությունում մեջբերեցին «ԱրմենՏել» ՓԲԸ Գլխավոր տնօրեն Իգոր Կլիմկոյին:
Կանխավճարային համակարգի բաժանորդներին փաթեթները տրամադրվում են 30 օր ժամկետով՝ սկսած ակտիվացման օրվանից: Ինտերնետ-փաթեթի գործողության ժամկետում նոր փաթեթ միացնելու դեպքում, նոր փաթեթի ՄԲ-երը ավելանում են դեռևս չսպառված ՄԲ-երին, իսկ գործողության ժամկետը սահմանվում է 30 օր նոր փաթեթի միացման պահից:
Այս ծառայությունից կարող են օգտվել թե կանխավճարային, թե հետվճարային համակարգի բաժանորդները:
«ԱրմենՏել» ՓԲԸ- ն «Վիմպելկոմ» ընկերության դուստր ձեռնարկությունն է (Beeline ապրանքանիշ): 2007 թվականի ապրիլից: «ԱրմենՏելի» 100 տոկոս բաժնետոմսերը պատկանում են ռուսական ընկերությանը, որը մատուցում է ձայնային կապի և տվյալներիփոխանցման ծառայություններ անլար և ֆիքսված հեռախոսակապի տեխնոլոգիաների լայն շրջանակում, ինչպես նաև լայնաշերտ Ինտերնետ կապի ծառայություններ: -0-