ՀՀ Գեղարքունիքի մարզում «Օրանժ Արմենիա» ընկերության օժանդակությամբ համակարգչային կենտրոններ են գործարկվել

ԵՐԵՎԱՆ, 25 փետրվարի. /ԱՌԿԱ/. «Օրանժ Արմենիա» ընկերության աջակցությամբ Գեղարքունիքի մարզի Ճամբարակ և Մարտունի քաղաքներում գերարագ ինտերնետով ժամանակակից համակարգչային կենտրոններ են բացվել, հայտնում է ընկերության մամուլի ծառայությունը։

Հաղորդագրության համաձայն, բնակիչներն այս կենտրոններում կարող են առանց տանը համակարգիչ ու ինտերնետ ունենալու անհրաժեշտության, օգտվել նորագույն տեխնոլոգիաներից, սովորել կիրառել տարբեր ծրագրեր, մուտք ունենալ դեպի համաշխարհային ցանց, մասնակցել տարբեր քննարկումների ու ֆորումների, ինչպես նաև՝ կրթական ծրագրերի:

Մարտունու համակարգչային սրահը ստեղծվել է Եվրասիա Համագործակցություն հիմնադրամի համագործակցությամբ և զինված է հինգ համակարգիչներով, տպիչով և Orange Ֆլայբոքս երթուղիչով։  Սրահի ստեղծման համար Orange-ը տրամադրել է 2 միլիոն դրամ:

Ճամբարակի համակարգչային սրահի բացմանն օժանդակել է «Բերքաշատ» ՀԿ–ն։  Սրահը նույնպես համալրված է  5  համակարգչով, տպիչով և Orange-ի Flybox երթուղիչով, որոնք Ճամբարակի և շրջակա գյուղերի բնակիչներին հնարավորություն են տալիս ոչ միայն կապի մեջ լինել աշխարհի հետ, այլ նաև մասնակցել համակարգչային դասընթացների: Նախագծի համար Orange-ն ընդհանուր առմամբ տրամադրել է 1.9 միլիոն դրամ:

«Orange-ը մեծ ջանքեր է գործադրել, որպեսզի Հայաստանում կառուցի գերժամանակակից ցանց և ժամանակակից տեխնոլոգիաները հասանելի դարձնի բոլորին: Սակայն գիտակցելով, որ դեռևս ոչ բոլորն են կարող ունենալ սեփական համակարգիչ տանը և օգտվել ինտերնետից, մենք մեր պատասխանատվությունն ենք համարում օգնել այդ խոցելի խմբերին, հատկապես Հայաստանի մարզերում, որտեղ ինտերնետը նոր է սկսում դառնալ առօրյա գործիք»,–ասաց Orange-ի գլխավոր տնօրեն Ֆրանսիս Ժելիբտերը:

«Orange Armenia»–ն France Telecom–ի (Orange ապրանքանիշ) 100–տոկոսանոց դուստրն է։ «Օրանժ Արմենիա» ընկերությունը, որը հայկական շուկայում սկսել է գործել 2009 թվականի նոյեմբերի 5-ից, Ֆրանս Տելեկոմի 100% դուստր ընկերությունն է: Օրանժը 83 տոկոս ծածկույթ է ապահովել և բջջային կապ ու համացանցի հասանելիություն՝ երկրի 500 համայնքներում (քաղաքներ և գյուղեր):--0-