Հայտարարվել են բրիտանական ֆիլմերի փառատոնի շրջանակում գրախոսականների հաղթողները
ԵՐԵՎԱՆ, 23 մարտի. /ԱՌԿԱ/. Բրիտանական ֆիլմերի 14-րդ փառատոնի շրջանակում հայտարարված Լավագույն գրախոսականի մրցույթի հաղթողներ դարձան Սեգ Կիրակոսյանը և Արտակ Վարդանյանը, հայտնում է «ԱրմենՏել» ընկերության » (ապրանքանիշը`Beeline) մամուլի ծառայությունը։
Այս տարի մրցույթին ներկայացվել էր 20-ից ավելի աշխատանք: Հաղթողները գրախոսական էին ներկայացրել «Էմի» ֆիլմի վերաբերյալ և ժյուրիի գնահատմամբ արժանացել են հավասար միավորների:
«Անչափ ոգևորիչ է այն հանգամանքը, որ յուրաքանչյուր տարի թվով ավելի շատ մարդիկ են հետաքրքրվում և մասնակցում արդեն ավանդույթ դարձած Լավագույն գրախոսականի մրցույթին։ Շնորհավորում եմ հաղթողներին և մաղթում նորանաոր ձեռքբերումներ։ Հավատացած եմ, որ Beeline-ը նման նախաձեռնություններով, օգնում է մարդկանց կյանքը դարձնել ավելի լավը»,– նշեց Հայաստանում Beeline-ի Գլխավոր Տնօրեն Անդրեյ Պյատախինը։
Արդեն ամենամյա դարձած այս մրցույթի նպատակն է նպաստել ֆիլմերի գրախոսական ժանրի զարգացմանը Հայաստանում: Յուրաքանչյուր տարի փառատոնի մասնակիցները կարող են գրել իրենց գրախոսականները ֆիլմերի վերաբերյալ և ներկայացնել մրցույթին: Աշխատանքները գնահատում է պրոֆեսիոնալ ժյուրին` հաշվի առնելով ներկայացված աշխատանքների մասնագիտական հմտությունը:
«Ոգևորիչ է տեսնել, որ փառատոնը նպաստում է ոչ միայն բրիտանական կինոարվեստի ներկայացմանը, այլև աջակցում գրախոսականի ժանրի զարգացմանը: Մեզ համար ուրախալի է, որ մրցույթին մասնակցում են ինչպես պրոֆեսիոնալ լրագրողները, այնպես էլ կինոսիրողները»,-ասաց Բրիտանական խորհրդի հայաստանյան մասնաճյուղի տնօրեն Արևիկ Սարիբեկյանը:
Գլխավոր մրցանակից բացի, երեք մասնակիցներ` Շողեր Պետրոսյանը` «Լսիր ինձ, Մառլոն», Հասմիկ Լեյլոյանը` «Ծովախեցգետինը» և Սարգիս Սարուխանյանը`«Ծովախեցգետինը» ֆիլմերի գրախոսակնների համար արժանացել են խրախուսական մրցանակների:
Բոլոր աշխատանքները ներկայացված են «Կինոաշխարհ» կայքում: Մրցանակները հաղթողներին կհանձնվի Բրիտանական ֆիլմերի փառատոնի փակման արարողության ընթացքում, որը տեղի կունենա մարտի 29-ին:
Մրցույթի կազմակերպիչներն էին` Բրիտանական խորհուրդը, Երևանում Բրիտանական դեսպանատունը և «ԱրմենՏել» (ապրանքանիշը`Beeline) ընկերությունը: -0-