«Հայփոստ»–ը և «ԱՔՌԱ Քրեդիտ Ռեփորթինգ» ՓԲԸ ծառայություններ կմատուցի նաև ՀՀ մարզերում
ԵՐԵՎԱՆ, 8 դեկտեմբերի. /ԱՌԿԱ/. «Հայփոստ» ՓԲԸ և «ԱՔՌԱ Քրեդիտ Ռեփորթինգ» ՓԲԸ համատեղ ծրագիրն է մեկնարկել ՀՀ բոլոր մարզերում, հայտնում է«Հայփոստ» ՓԲԸ մամուլի ծառայությունը։
Ծրագիրը թույլ է տալիս ֆիզիկական և իրավաբանական անձանց (վարկային տեղեկատվության սուբյեկտներին) պատվիրել և ստանալ իրենց վարկային պատմությունը (վարկային զեկույցը) Հայփոստի բաժանմունքների միջոցով:
Մինչ այժմ վարկային զեկույցի թղթային տարբերակը վարկային տեղակատվության սուբյեկտները կարող էին ստանալ միայն «ԱՔՌԱ Քրեդիտ Ռեփորթինգ» ՓԲԸ գրասենյակում և «Հայփոստ» ՓԲԸ Երևանի փոստային բաժանմունքներում:
«Այսուհետ «ԱՔՌԱ Քրեդիտ Ռեփորթինգ» ՓԲԸ-ի և «Հայփոստ» ՓԲԸ-ի համագործակցության շնորհիվ՝ հաճախորդները, խնայելով ժամանակը, կարող են ստանալ իրենց վարկային զեկույցը «Հայփոստ» ՓԲԸ-ի մոտակա փոստային բաժանմունքում»,– ասվում է հաղորդագրությունում։
Վարկային զեկույցը պատվիրելու համար հաճախորդները կարող են իրենց անձը հաստատող փաստաթղթերն ու դրանց պատճեները ներկայացնել «Հայփոստ» ՓԲԸ-ի ցանկացած փոստային բաժանմունքում և համապատասխան դիմում ներկայացնել։ -0-