Հայաստանում ՏՏ ոլորտի շրջանառությունը 2015 թ.-ին աճել է 17%-ով. նախարար

ԵՐԵՎԱՆ, 30 մայիսի. /ԱՌԿԱ/. Հայաստանում տեղեկատվական տեխնոլոգիաների ոլորտի ընդհանուր շրջանառությունը 2015 թ.-ին գնահատվում է մոտ 550 մլն դոլար` նախորդ տարվա համեմատ աճելով 17 տոկոսով, երկուշաբթի խորհրդարանում հայտարարեց ՀՀ Էկոնոմիկայի նախարար Արծվիկ Մինասյանը:

Նա նշեց, որ տեղեկատվական տեխնոլոգիաների ոլորտի զարգացման ծրագրի շրջանակում 2015 թ.-ին իրականացվել է ոլորտի ուսումնասիրում, որի համաձայն, երկրում ակտիվ գործում են մոտ 400 ՏՏ ընկերություններ:

Նրա խոսքով, Հայաստանում այսօրվա դրությամբ տեղեկատվական տեխնոլոգիաների ոլորտում գրանցված է մոտ 15 հազար մասնագետ:

«ՏՏ ոլորտի զարգացմանն ուղղված պետական աջակցման շնորհիվ` 2015 թ.-ին ստեղծվել են 79 սկսնակ ընկերություններ և բացվել 329 աշխատատեղեր», - ընդգծեց նախարարը:

Բացի այդ, Մինասյանի խոսքով, 2015 թ.-ին կազմակերպվել է DigiTec բիզնես-ֆորումը, որին մասնակցել է շուրջ 40 ընկերություն:

Նախարարն ընդգծեց, որ 2015 թ.-ին Հայաստանում և Ղարաբաղում անցկացվել է  բարձր տեխնոլոգիաների ArmTech համաժողովը, որին մասնակցել է շուրջ 350 ընկերություն:

 «Հայ-հնդկական ՏՀՏ գերազանցության կենտրոնում ավելի քան 1000 մասնակիցների հետ» կազմակերպվել է 59 պարապմունք և 18 սեմինար: Microsoft նորարարական կենտրոնում անցկացվել է 47 պարապմունք, որոնց մասնակցել է ավելի քան 600 մասնակից», - ընդգծեց Մինասյանը: -0-