Հայաստանում ՏՏ ոլորտի պահանջարկն անսահմանափակ է. Ենգիբարյան

ԵՐԵՎԱՆ, 24 հունիսի. /ԱՌԿԱ/. Հայաստանի տնտեսության մեջ ՏՏ ոլորտը միակն է, որ մասնագետների անսահմանափակ պահանջարկ ունի, «ԱՌԿԱ» գործակալությանն ասաց «Ձեռնարկությունների ինկուբատոր» հիմնադրամի (Enterprises Incubator Foundation - EIF) տնօրեն Բագրատ Ենգիբարյանը։

«Ես չեմ խոսում այն մասին, որ Հայաստանի բոլոր բնակիչները պետք է ծրագրավորողներ դառնան, սակայն մեծ պահանջարկ կա, և պետք է համապատասխան պայմաններ ստեղծել` տարեկան գոնե երկու հազար մասնագետ պատրաստելու նշաձողին հասնելու համար»,– ասաց նա։

Ենգիբարյանի կարծիքով` ՏՏ ոլորտի գլխավոր խնդիրներից մեկն է շարունակում մնալ որակյալ կադրերի պակասը։

Նա նշեց, որ կառավարության և Ինֆորմացիոն տեխնոլոգիաների ընկերությունների միության ծրագրերում այս բաղկացուցիչը գերակա է համարվում։

«Մի քանի մեծ նախագծեր կան, որոնք, կարծում եմ, կարող են փոխել իրավիճակը։ Օրինակ` Ազգային ճարտարագիտական լաբորատորիան, որն ուղղակիորեն ազդում է Պոլիտեխնիկում առկա կրթության գործընթացի վրա»,– նշեց նա։

EIF տնօրենն ասաց նաև, որ ապագայում ծրագրվում է համագործակցել ամերիկյան բուհերի հետ` ուսանողների համար տարբեր դասընթացներ կազմակերպելու և դպրոցներում ՏՏ դասընթացներ անցկացնելու համար։

«Մտածողությունը պետք է ձևավորել դպրոցից։ Դպրոցը ոսկե մեդալով և բուհը կարմիր դիպլոմով ավարտած երիտասարդները  ստիպված են որակավորման բարձրացման դասընթացների մասնակցել, որպեսզի ՏՏ ոլորտի մասնագետ դառնան»,– նշեց նա։

ՀՊՃՀ–ում Ազգային ճարտարագիտական լաբորատորիան բացվել է սեպտեմբերին։ Հիմնական գործունեությունն ուղղվելու է ճարտարագիտական ոլորտի 39 հիմնական ուղղությունների խթանմանը։

ՀՊՃՀ–ում Ազգային ճարտարագիտական լաբորատորիայի  ստեղծումը նախատեսող փոխըմբռնման հուշագիրը ստորագրվել է 2012 թվականի մայիսի 4–ին Հայաստանի կրթության և գիտության նախարարության, ԱՄՆ–ի դեսպանության, USAID–ի և ՀՊՃՀ–ի միջև։

2000 թվականին Հայաստանի կառավարությունը ՏՏ ոլորտը հայտարարեց երկրի տնտեսության գերակա ոլորտ։ Այսօր Հայաստանի ՏՀՏ ոլորտում գործում է մոտ 350 ձեռնարկություն, որտեղ աշխատում է շուրջ 10 հազար աշխատակից։ -0-