USD
381.43
EUR
440.89
RUB
4.8627
GEL
141.17
2025 թ. դեկտեմբերի 1, երկուշաբթի
եղանակը
Երևանում
+2

Հայկական ՏՏ ընկերությունները հաղթող են ճանաչվել Թբիլիսիում անցկացվող GITI համաժողովի երեք անվանակարգերում

04.12.2013, 18:15
Հայկական ՏՏ ընկերությունները հաղթող են ճանաչվել նոյեմբերի 28-29 Վրաստանի մայրաքաղաք Թբիլիսիում տեղի ունեցած GITI-2013 տարածաշրջանային ՏՏ միջոցառման երեք անվանակարգերում, հայտնում են ԻՏՁՄ մամուլի ծառայությունից։
Հայկական ՏՏ ընկերությունները հաղթող են ճանաչվել Թբիլիսիում անցկացվող GITI համաժողովի երեք անվանակարգերում
ԵՐԵՎԱՆ, 4 դեկտեմբերի. /ԱՌԿԱ/. Հայկական ՏՏ ընկերությունները հաղթող են ճանաչվել նոյեմբերի 28-29 Վրաստանի մայրաքաղաք Թբիլիսիում տեղի ունեցած GITI-2013 տարածաշրջանային ՏՏ միջոցառման երեք անվանակարգերում, հայտնում են ԻՏՁՄ մամուլի ծառայությունից։

Հայկական պատվիրակության մեջ ներառված էին Technology and Science Dynamics Inc․/Armtab Technologies, Instigate, Symotec, Synergy ընկերությունները, Գյումրու Տեղեկատվական Տեխնոլոգիաների Կենտրոնը: Պատվիրակության աշխատանքները համակարգում էր Ինֆորմացիոն տեխնոլոգիաների ձեռնարկությունների միությունը։

Հայկական պատվիրակությունն ավանդաբար կազմակերպված հայկական ՏՏ անկյունում ներկայացնում էր մի շարք լուծումներ, այդ թվում` 3D տպիչ, ռոբոտներ, հայկական առաջին թաբլետ համակարգիչը՝ ArmTab–ը, լուծումներ հյուրանոցային, ռեստորանային և սպասարկման ոլորտների համար, կրթական նախաձեռնություններ:

Մրցանակաբաշխությանը ներկայացված հայկական ընկերությունների հայտերից երեքն արժանացան մրցանակի։    Technology and Science Dynamics Inc ընկերության լուծումները հյուրանոցային, ռեստորանային և սպասարկման ոլորտների համար արժանացան «Տարվա ծրագրային ապահովում» և «Լավագույն Մուլտիմեդիա Լուծում» մրցանակների։

«ՏՏ Կրթության լավագույն ծրագիր» մրցանակին արժանացավ Instigate ընկերությունը` ներկայացնելով Նաիրի կոնսորցիումի համալիր կրթական ծրագրերը:

Ինֆորմացիոն տեխնոլոգիաների ձեռնարկությունների միությունը հիմնադրվել է 2000թ.–ին` ոլորտի ձեռնարկությունների շահերի պաշտպանության, բիզնեսի խթանման նպատակով: Գործունեության շրջանակում ԻՏՁՄ-ն կազմակերպում է մի շարք միջոցառումներ` ուղղված ՏՀՏ ոլորտի համար բարենպաստ բիզնես միջավայրի ստեղծմանը, այդ թվում` DigiTec Expo ամենամյա ՏՀՏ/ԲՏ միջազգային ցուցահանդեսը, DigiTec բիզնես ֆորումը, ՏՀՏ լիդերների հանդիպում-ֆորումը, ԱրմՌոբոտիքսը, Համակարգչային և բջջային խաղերի նախագծման Հայաստանի բաց առաջնությունը, DigiCamp ամառային տեխնոլոգիական ձեռներեցության ճամբարը:-0-