Երևանի բժշկական համալսարանում հերթական էլեկտրոնային գրադարանն է բացվել

ԵՐԵՎԱՆ, 17 փետրվարի. /ԱՌԿԱ/. Երեքշաբթի Երևանի Մխիթար Հերացու անվան պետական բժշկական համալսարանում հերթական էլեկտրոնային գրադարանն է բացվել։

Բացման արարողությանը ներկա է եղել ՀՀ ԿԳ նախարար Արմեն Աշոտյանը։

«Նոր էլեկտրոնային լսարանը կծառայի երկու նպատակի։ Առաջին հերթին` որպես էլեկտրոնային գրադարան, ինչն ինքնին նորույթ չէ, սակայն ընդլայնում է ժամանակակից տեխնոլոգիաներից օգտվելու ուսանողների հնարավորությունները։ Այս տեսակետից գրադարանում լրացուցիչ 100 տեղը բավականին մեծ ձեռքբերում է», – նշել է Աշոտյանը։

Նա ավելացրել է, որ լսարանը նաև կօգտագործվի քննությունների հանձնման էլեկտրոնային համակարգի աշխատանքի ժամանակ։ «Մենք բոլորս գիտենք, որ քննությունների արդյունքների անաչառությունը բարձրացնելու համար արդյունավետ միջոց է այդ գործընթացում մարդկային գործոնի բացառումը կամ կրճատումը։ Դա նաև օգնում է էապես նվազեցնել կոռուպցիոն ռիսկերը», – նշել է նախարարը։

Նրա խոսքով` շատ կարևոր է այն, որ լսարանը կօգտագործվի ոչ միայն քննությունների ժամանակ, այլ նաև ուսուցման ընթացքում, ինչը թույլ կտա ուսանողներին բացահայտել իրենց ուժեղ և թույլ կողմերը։

«Մեր երկրի կրթական համակարգի բարեփոխումների արդյունքում շատ քննադատություն է հնչել այն մասին, թե որքանով է ճիշտ քննությունների հանձնման էլեկտրոնային համակարգին անցում կատարելը, և արդյո՞ք դա հնարավորություն է տալիս ամբողջովին ստուգել ուսանողների գիտելիքները», – ավելացրել է Աշոտյանը։

Նախարարը նշել է, որ ինչ–որ չափով համաձայն է նմանատիպ քննադատության հետ, քանի որ երկար տարիներ բազմաթիվ կրթական հաստատություններում քննական թեստերի հանձնումը կրում էր մեխանիկական բնույթ։

«Այս տեսակետից շատ կարևոր է, որ մեր դասախոսները կազմեն այնպիսի թեստեր, որոնք օգնում են ամբողջությամբ բացահայտել գիտելիքները։ Սա, իհարկե, մեծ պրոֆեսիոնալիզմ է պահանջում», – ավելացրել է Աշոտյանը։

Նրա խոսքով` նոր էլեկտրոնային լսարանը բժշկական համալսարանի թվով երկրորդ էլեկտրոնային լսարանն է և վերջինը չէ, քանի որ նախատեսվում է, որ ընդունելության բոլոր քննությունները հանձնվելու են էլեկտրոնային տարբերակով։

«Մենք այս կապակցությամբ հետազոտություն ենք կատարել և եկել ենք այն եզրահանգման, որ քննություն անցկացնելու նոր տիպին անցնելը բավականին իրատեսական է։ Մենք նախագծին նախնական ֆինանսական գնահատական ենք տվել։ Դա բավականին մեծ գումար է` մոտ 12 մլն դոլար։ Սակայն նոր համակարգը թույլ կտա էապես բարձրացնել օբյեկտիվության մակարդակը», – նշել է նախարարը։

Նոր էլեկտրոնային գրադարանը նախատեսված է 80 տեղի համար։ Առաջիկայում նախատեսվում է ավելացնել է այն` հասցնելով 250–ի։ Գրադարանում կլինի հայերեն, ռուսերեն, անգլերեն գրականություն։–0–