«ԲարՔեմփ» չկոնֆերանսն է անցկացվել Վանաձորում «Ռոստելեկոմի» հովանավորությամբ
ԵՐԵՎԱՆ, 7 նոյեմբերի. /ԱՌԿԱ/. Տեղեկատվական տեխնոլոգիաներին, Համացանցին և Նոր մեդիաներին առնչվող թեմաներին նվիրված «Բարքեմփ» ոչ ֆորմալ Կոնֆերանսը (Չկոնֆերանսը) անցկացվեց նոյեմբերի 6-ին«Ռոստելեկոմի» աջակցությամբ «Վանաձորի տեխնոլոգիական կենտրոնում» (VTC), հայտնում է ընկերության մամուլի ծառայությունը։
Ըստ հաղորդագրության, Վանաձորում ծրագրի անցկացման նպատակն էր նպաստել քաղաքային էլեկտրոնային հասարակության ձևավորմանն ու զարգացմանը, ինչպես նաև երիտասարդների ներգրավվածությանը տեխնոլոգիաների զարգացման գործում։
«Նոր տեխնոլոգիաներն արդեն իսկ ներխուժել են առօրյա և մեզանից յուրաքանչյուրն իր մասնակցությունը կարող է ունենալ դրանց զարգացման գործում՝ ներկայանալով ու իր գաղափարները կիսելով նման կոնֆերանսների և չկոնֆերանսների շրջանակներում։ «Ռոստելեկոմի» տեխնոլոգիաները նորագույններից են, որովհետև մենք կարևորում ենք յուրաքանչյուր նոր լուծում, նոր տեխնոլոգիա և նոր գաղափար։ Այստեղ՝ Վանաձորի տեխնոլոգիական կենտրոնում, այդ ամենն իրագործելու համար անհրաժեշտ է միայն ցանկություն և ձգտում։ Սա արդեն իսկ իրողություն է և VTC-ն իր գործիքակազմով հնարավորություններ են ստեղծվում բազմաթիվ տեխնոլոգիական գաղափարների և լուծումների զարգացման համար։ Համոզված եմ՝ այսօր մեզ բոլորիս սպասվում է արդյունավետ և հետաքիր օր «Բարքեմփի» շրջանակներում։ Ես անգամ մի քանի քննարկումներ առանձնացրել եմ ինձ համար և կմասնակցեմ»,- կոնֆերանսի պաշտոնական բացմանը մասնակիցներին ողջունեց «Ռոստելեկոմի» գլխավոր տնօրեն Հայկ Ֆարամազյանը։
«Բարքեմփի» շրջանակներում ներկայացվեցին «մասնակցային» աշխատանքային սեմինար-միջոցառումներ, որոնք բաց էին յուրաքանչյուրի համար և ֆորմատին համաձայն չկար հանդիսատես և բոլորը մասնակից էին։
Կազմակերպչական աշխատանքում ներգրավված էին ինչպես գործընկերներ «Ձեռնարկությունների ինկուբատոր հիմնադրամը» (EIF) և «Վանաձորի տեխնոլոգիական կենտրոնը» (VTC), հովանավոր հայաստանյան «Ռոստելեկոմը», այնպես էլ աջակիցները՝ «Բարքեմփ Երևանի» և «Բարքեմփ Գյումրու» թիմերը:
Կազմակերպիչների թիրախում էին Նոր մեդիայում, Ինտերնետ, Տեղեկատվական և Բարձր տեխնոլոգիաներում ներգրավված գործարարներ, ընկերությունների ղեկավարներ և մասնագետներ, ծրագրավորողներ, դիզայներներ, դասախոսներ, ուսանողներ, բլոգերներ, լրագրողներ, առցանց հրատարակիչներ, ցանցի ակտիվ դեմքեր ու պարզապես հետաքրքրասեր մարդիկ, այսինքն՝ բոլոր նրանք, ովքեր ստեղծում են նոր սերնդի համաշխարհային սարդոստայնը։
ԲարՔեմփ են անվանում Տեղեկատվական տեխնոլոգիաների, Ինտերնետի և Նոր մեդիաների թեմաներով չկոնֆերանսները։ Այն 2005թ.-ից մասնակիցների կողմից կազմակերպվող ոչ-ֆորմալ կոնֆերանսների միջազգային ցանց է (ոչ ֆորմալ և կոնֆերանս բառերի միաձուլումից (անգլերեն unConference=unformal+conference)):
Այդ կոնֆերանսներն իրենցից ներկայացնում են «մասնակցային» աշխատանքային սեմինար-միջոցառումներ, որոնք բաց են բոլոր ցանկացողների համար ու ողջ փիլիսոփայությունը նրանում է, որ կարող են ընդհանրապես չլինել հատուկ հրավիրված բանախոսներ:
ԲարՔեմփը ամենամասնակցային ֆորմատի միջոցառումներից է. մասնակիցներն են նախաձեռնում, կազմակերպում ու անցկացնում միջոցառումը, մասնակիցներն իրենք են բերում ներկայացվելիք թեմաներն ու նյութերը, իրենք են զեկուցումներն անում ու քննարկում դրանք։ Ելույթները կատարվում են բաց ու անկաշկանդ միջավայրում։
Մթնոլորտը հետաքրքիր է այնքանով, որ ԲարՔեմփի մասնակիցները հետևում են ելույթներին և միաժամանակ լուսաբանում ու մեկնաբանում են միջոցառումը համացանցում: Մասնակիցները նաև «քվեարկում են ոտքերով»: Այսինքն, եթե թեման հետաքրքրական չէ, նրանք ազատ կարող են լքել այդ լսարանն ու տեղափոխվել այլ սրահ՝ լսելու զուգահեռ ընթացող մեկ այլ ելույթ:
Հայաստանում առաջին Բարքեմփն անցկացվել է 2009 թվականին Երևանում: Այս տարվա` 8–րդ միջոցառման մասնակիցների թիվն անցավ 2500-ից (կայքը՝ http://www.barcamp.am/):
«Ռոստելեկոմ» ԲԲԸ–ի հայկական դուստր ընկերությունը` «GNC-ALFA» ՓԲԸ–ն, 2012 թ.–ի դեկտեմբերից սկսել է կապի ծառայություններ մատուցել Հայաստանի տարածքում Rostelecom ապրանքանիշի ներքո։
Ընկերության օպտիկամանրաթելային ցանցը ծածկում է Հայաստանի տարածքի 80 տոկոսն` ավելի քան 2500 կմ ընդհանուր երկարությամբ։ Ցանցը միացված է հիմնական տարածաշրջանային մայրուղային ցանցերին և տրաֆիկի փոխանակման խոշոր հանգույցներին, ինչպես նաև Վրաստանի և Իրանի տարածքով անցնող միջազգային խողովակներին։ –0–