«ԱրմենՏելը» շարունակում է աջակցել վարպետության դասերի անցկացմանը մարզային դպրոցներում

ԵՐԵՎԱՆ, 18 մարտի. /ԱՌԿԱ/. «ԱրմենՏել» ընկերությունը (ապրանքանիշը` Beeline) «Դասական երաժշտության զարգացման» հիմնադրամի հետ համատեղ հայտարարում են Հայաստանի մարզային երաժշտական դպրոցներում վարպետության դասերի անցկացման մասին:

Այսօր Ա. Խաչատրյանի անվան եռյակի երաժիշտներն, ովքեր հանդիսանում են հիմնադրամի Հոգաբարձուների խորհրդի անդամներ, Մակար Եկմալյանի անվան Էջմիածնի երաժշտական դպրոցում վարպետության դասեր անցկացրին։ Այս միջոցառումով փակվեց Եռյակի մարտ ամսվա համերգային ծրագիրը։ Այս համերգային ծրագրի շրջանակում մարզային երաժշտական դպրոցների սաների համար վարպետության դասեր և համերգներ են կազմակերպվել նաև մարտի 13-ին Չարենցավանում և մարտի 15-ին՝ Վանաձորում:

Ա. Խաչատրյանի անվան եռյակն, որն այս տարի նշում է իր 15-ամյա հոբելյանը, ներկայացրեց մեծանուն կոմպոզիտորներ Ռախմանինովի, Արենսկիի և Խաչատրյանի ստեղծագործությունները։ Ընդհանուր առմամբ, միայն այս տարվա մարտ ամսին  վարպետության դասերին և համերգներին այցելել են ավելի քան 500 մարդ, իսկ Վանաձորի թիվ 3 երաժշտական դպրոցի թավջութակի դասարանին տրամադրել է վերականգնված թավջութակը։

«ԱրմենՏել» ընկերության սոցիալական ծրագրերի հիմնական նպատակն է դարձնել կյանքն ավելի լավ։ «Դասական երաժշտության զարգացմանե հիմնադրամի հետ համագործակցությունն այս կարգախոսի իրականացման վառ օրինակներից մեկն է։ Երաժշտական դպրոցների սաները ձեռք են բերում փորձ և գիտելիքներ, ստանում նոր գործիքներ, իսկ ամենատաղանդաշատ երեխաները՝ կրթաթոշակներ։ Ուրախ ենք, որ մեր օգնությամբ կօգնենք այս երեխաներին իրականացնել իրենց երազանքը և դառնալ ճանաչված երաժիշտներ», - նշեց  «ԱրմենՏել» ընկերության գլխավոր տնօրեն Անդրեյ Պյատախինը:

Ա. Խաչատրյանի անվան եռյակի ջութակահար Կարեն Շահգալդյանը ասաց. «Անհրաժեշտ է, որ մայրաքաղաքի արվեստագետները երաժշտական գործունեություն իրականացնեն նաև մարզերում։ Ուրախությամբ կարող ենք փաստել, որ կրթաթոշակի արժանացած որոշ երիտասարդների մոտ լուրջ առաջընթաց է նկատվում  և նրանք հատուկ ուշադրության են արժանանում մեր կողմից։ Այդ իսկ պատճառով, չնայած Հայաստանից դուրս այս տարվա մեր լուրջ շրջագայության ժամանակացույցին, մենք կշարունակենք ընդլայնել և զարգացնել մեր գործունեության այս ոլորտը»։

«Դասական երաժշտության զարգացման» հիմնադրամը ստեղծվել է Ա. Խաչատրյանի անվան եռյակի երաժիշտների կողմից 2010թ–ին։ Հիմնադրամի հիմնական գործունեությունն ուղղված է կրթական և բարեգործական ծրագրերի իրականացմանը դասական երաժշտության ոլորտում: «ԱրմենՏել» ընկերությունը հանդիսանում է Հիմնադրամի մշտական գործընկերը 2011թ–ից ի վեր։
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։–0–