«ԱրմենՏել» ընկերությունը շարունակում է ընդլայնել բջջային ցանցը սահմանամերձ գյուղերում

ԵՐԵՎԱՆ, 8 օգոստոսի. /ԱՌԿԱ/. «ԱրմենՏել» ընկերությունը (ապրանքանիշը` Beeline) հայտարարում է բջջային ցանցի ընդլայնման մասին հեռավոր սահմանամերձ գյուղերում:

2013թ.–ի օգոստոսի սկզբին ընկերությունն ընդլայնել է բջջային ցանցը Սյունիքի մարզի արևելյան սահմանի տարածքում` ապահովելով  Խնածախ և Վաղատուր գյուղերի բնակիչներին բջջային կապով և շարժական ինտերնետով: Ցանցի ընդլայնմանն ուղղված աշխատանքների արդյունքում  ծածկույթն ավելացել է
22 քմ. կիլոմետրով, իսկ բջջային կապի ծառայություններից և  3G ինտերնետից այսուհետ կարող են օգտվել ավելի քան 1500 բնակիչ:

«Համաձայն 2013 թվականի առաջին եռամսյակի արդյունքների` «ԱրմենՏել» ընկերությունը  դարձավ  առաջատար լայնաշերտ ինտերնետի բաժանորդային բազայի աճով: Նման արդյունքներին հասնել հնարավոր է միայն շարունակական ներդրումների շնորհիվ, որն իրականացվում է ոչ միայն մայրաքաղաքում, այլ Հայաստանի տարբեր շրջաններում: Նոր որդեգրած կորպորատիվ քաղաքականության շրջանակում մենք ոչ միայն կարևորում ենք սոցիալական բաղադրիչի ներառումը սակագնային քաղաքականության մեջ, այլ  մեծ ուշադրություն ենք դարձնում ցանցի ընդլայնմանը և որակյալ կապի տրամադրմանը անգամ երկրի ամենահեռավոր շրջաններում», - նշեց  «ԱրմենՏել» ընկերության Գլխավոր Տնօրեն Անդրեյ Պյատախինը:

«ԱրմենՏել» ընկերությունն իրականացնում է նաև աշխատանքներ ուղղված ֆիքսված ենթակառուցվածքների արդիականացմանը,  ինչը մոտ ապագայում, հնարավորություն կտա վերը նշված գյուղերի բնակիչներին օգտվել նաև Hi-Line լայնաշերտ ինտերնետի ծառայություններից:

«ԱրմենՏել» ՓԲԸ-ն (Beeline ապրանքանիշ) հանդիսանում է «ՎիմպելԿոմ» ընկերությունների խմբի մի մասը: «ՎիմպելԿոմը» հանդիսանում է աշխարհի խոշորագույն ինտեգրված օպերատորներից մեկը, որն ընդգրկում է մի շարք հեռահաղորդակցության ընկերություններ, որոնք մատուցում են ինչպես անլար և ամրակցված կապի տեխնոլոգիաների լայն շրջանակի վրա հիմնված ձայնային կապի ու տվյալների հաղորդման,  այնպես էլ լայնաշերտ ինտերնետ հասանելիության ծառայություններ։ -0-