Արցախի վարչապետը «Ղարաբաղ Տելեկոմ» ընկերության սեփականատիրոջ հետ քննարկել է ԼՂՀ–ում նոր ներդրումների հեռանկարները
ՍՏԵՓԱՆԱԿԵՐՏ, 26 մարտի. /ԱՌԿԱ/. Արցախի Հանրապետության վարչապետ Արա Հարությունյանը, ով աշխատանքային այցով Լիբանանում է գտնվում, մարտի 23–ին հանդիպում է ունեցել գործարար, «Ղարաբաղ Տելեկոմ» ընկերության սեփականատեր Պիեր Ֆատուշի հետ, հայտնում է Արցախի հանրային հեռուստատեսությունը:
Հաղորդագրության համաձայն` Հանդիպմանը քննարկվել են Արցախում նոր ներդրումների հնարավորությունները:
Նույն օրը ղարաբաղյան կառավարության ղեկավարը Բեյրութում հանդիպել է հայ և լիբանանցի գործարարների հետ:
Ղարաբաղյան պատվիրակությունն այցելել է Այնճար հայկական գյուղ` արժանանալով ժողովրդական մեծ ընդունելության:
Վարչապետի գլխավորած պատվիրակության կազմում են ԼՂՀ գյուղի և գյուղատնտեսության օժանդակության հիմնադրամի տնօրեն Վահրամ Բաղդասարյանը, «Դաշնակցության» Ղարաբաղի կենտրոնական կոմիտեի ներկայացուցիչ Դավիթ Իշխանյանը և Լիբանանում ԼՂՀ մշտական ներկայացուցիչ Կարո Քեբաբջյանը:-0-