Վանաձորում տեխնոպարկ կկառուցվի

ԵՐԵՎԱՆ, 4 դեկտեմբերի. /ԱՌԿԱ/. Գյումրու տեխնոպարկի նմանությամբ տեխնոպարկ կկառուցվի նաև Վանաձորում, ԱԺ–ում հարցուպատասխանի ժամանակ ասաց էկոնոմիկայի նախարար Վահրամ Ավանեսյանը։

«Արդեն բանակցություններ են սկսվել այն ընկերությունների հետ, որոնք իրենց գործունեությունն են ծավալել Գյումրու տեխնոպարկում։ Առայժմ վաղ է խոսել արդյունքների մասին, բայց մենք արդեն սկսել ենք տարածքի տրամադրման և շենքի կառուցման հետ կապված գործընթացը»,– ասաց Ավանեսյանը։

Նա նշեց, որ շինարարության ավարտից հետո Էկոնոմիկայի նախարարությունը կսկսի կազմել այն ընկերությունների ցուցակը, որոնք աշխատելու են տեխնոպարկում։

Հայաստանի կառավարությունը 2010թ. մայիսի 27-ին հաստատել է Գյումրու տեխնոպարկի 2010թ. գործունեության ծրագիրը: Գյումրիում տեխնոպարկի ստեղծման ծրագիրը ՀՀ կառավարության կողմից հաստատվել է դեռևս 2006 թ.-ի մարտի 2-ին: ՀՀ կառավարությունը 2009 թ.-ի ապրիլի 9-ին հավանություն է տվել Գյումրիում տեխնոպարկի գործունեության պետական աջակցության ծրագրին:

Տեխնոպարկ-ինկուբատորի գործունեության հիմնական ուղղությունները կապված են հետևյալ ոլորտների հետ՝ բարձր և տեղեկատվական տեխնոլոգիաներ, արվեստ, մոդելավորում, ոսկեգործություն և զբոսաշրջություն։ Ենթադրվում է, որ տեխնոպարկը հանդես կգա փոքր և միջին բիզնեսի ինկուբատորի դերում, որը կզբաղվի գիտատար արտադրությամբ, ինչը թույլ կտա ընդլայնել երկրի արտահանման հնարավորությունները:  –0–