Վրացական բջջային կապի բաժանորդներն այսուհետ կարող են Հայաստանից համալրել իրենց հաշիվները Telcell-ի միջոցով

ԵՐԵՎԱՆ, 15 հունիսի. /ԱՌԿԱ/. Վրացական բջջային կապի բաժանորդները, որոնք գտնվում են Հայաստանում, այսուհետ կարող են համալրել իրենց հաշիվները Telcell-ի տերմինալների միջոցով, երկուշաբթի «ԱՌԿԱ» գործակալությանը հայտնել են «Telcell» ՓԲԸ–ի մամուլի ծառայությունից։

Հաղորդագրության համաձայն` վճարումը կատարվում է հայկական դրամով, իսկ անձնական հաշիվները համալրվում են ակնթարթորեն:

Ինչպես հայտնում է մամուլի ծառայությունը` հղում անելով «ԹելՍել» ընկերության բիզնեսի զարգացման վարչության պետ Արթուր Խաչատուրյանին` վրացական «Նովա Տեխնոլոջի» ընկերության հետ ինտեգրել են հաշվեկշիռները համալրելու ծառայությունների համակարգ, ինչպես նաև բջջային օպերատորների վճարումները ինտեգրել են գործըկերոջ՝ Փեյ Բոքս (Pay Box) վճարային համակարգ։

Այսպիսով, Վրաստանի տարածքում գտնվող  հայկական բջջային օպերատորների բաժանորդները նույնպես կարող են համալրել իրենց հաշիվները Վրաստանից Pay Box տերմինալների օգնությամբ։

«ԹելՍել» ՓԲԸ–ն ներկայացված է Հայաստանի վճարումների ընդունման շուկայում 2007թ.–ի օգոստոսից: Այժմ Telcell պրոցեսինգային կենտրոնին միացված են վճարումների ընդունման ավելի քան 1500 կետեր Հայաստանի ողջ տարածքում, որոնք ընդունում են վճարումներ բջջային օպերատորների, ինտերնետ-պրովայդերների, բնակչությանը կոմունալ ծառայություններ մատուցող ընկերությունների, ֆինանսական ծառայությունների պետական պորտալների օգտին: Շուկայում ընկերությունը հանդես է գալիս Telcell ապրանքանիշի ներքո: -0-