Հայաստանում տեղի ունեցավ չորրորդ PR մրցանակաբաշխությունը
ԵՐԵՎԱՆ, 19 դեկտեմբերի./ԱՌԿԱ/. Հայկական Փի Ար ասոցիացիան Հայաստանում Beeline-ի հետ համագործակցությամբ արդեն չորրորդ անգամ պարգևատրեց հանրային կապերի և հաղորդակցության մասնագետներին, լավագույն ծրագրերի ու գաղափարների հեղինակներին, հայտնել է Beeline ընկերության մամուլի ծառայությությունը:
«Հանրային և քաղաքական դեմքերի, ընկերությունների ու պետական գերատեսչությունների աշխատանքը Հայկական Փի Ար ասոցիացիայի հետազոտական թիմի ուշադրության կենտրոնում է: Մրցանակաբաշխությունը միտված է բարձրացնել ու կարևորել հանրային կապերի մասնագետի դերը, արժևորել հանրույթի հետ հետադարձ կապը, խրախուսել հաղորդակցության կառավարման նոր մեթոդների ու տեխնոլոգիաների ստեղծումն ու կիրառումը, ի վերջո, արձանագրել ոլորտում առկա բացթողումներն ու հաղորդակցության խոչընդոտները»,- մանրամասնում է Հայկական Փի Ար ասոցիացիայի նախագահ, ԵՊՀ ժուռնալիստիկայի ֆակուլտետի «PR և հաղորդակցային տեխնոլոգիաներ» մագիստրոսական ծրագրի ղեկավար Աստղիկ Ավետիսյանը:
«Մենք առաջին տարին չէ, որ ակտիվորեն մասնակցում ենք այս մրցանակաբաշխության աշխատանքներին և կարող եմ ասել, որ տարեց տարի տեսնում ենք հանրային կապերի ոլորտի զարգացումը: Ամեն անգամ ավելի ու ավելի բարդ է դառնում հանձնաժողովի ընտրությունը, քանի որ բազմաթիվ հետաքրքիր ծրագրեր են իրականացվում», - նշեց Հայաստանում Beeline-ի գլխավոր տնօրեն Անդրեյ Պյատախինը։
Հայկական Փի Ար ասոցիացիան հետազոտությունն իրականացրել է երեք փուլով և հետազոտական տարբեր գործիքներով: Առաջին փուլում 1015 փորձագետի առաքվել է հարցաթերթիկ, որոնցից 890-ը պատասխանել է հարցադրումներին: Երկրորդ փուլում իրականացվել է ԶԼՄ-ների մշտադիտարկում, այդ թվում՝ ավտոմատացված: Երրորդ փուլում ձևավորվել է 32 ֆոկուս խումբ՝ յուրաքանչյուրում ներգրավված է եղել 11 հոգի: Ընդհանուր հաշվարկով 352 հոգի մեկ տարվա ընթացքում մասնակցել է ֆոկուս խմբերի քննարկումներին:
Մասնագետների կողմից ամփոփվել և վերլուծության է ենթարկվել հավաքագրված տեղեկատվությունը՝ որակական և քանակական հետազոտական մեթոդներով: 2019-ի դեկտեմբերին ձևավորվել են մրցանակաբաշխության անվանակարգերին համապատասխան լավագույն եռյակները, որոնք ուղարկվել են Հայկական PR մրցանակաբաշխության մասնագիտական հանձնաժողովի անդամներին: Մրցանակաբաշխությունից մեկ օր առաջ ամփոփվեցին արդյունքները, և լավագույնները պարգևատրվեցին հանդիսավոր արարողության ժամանակ:
Հայկական PR մրցանակաբաշխության մասնագիտական հանձնաժողովը կազմված է տեղական և միջազգային պրոֆեսիոնալ մասնագետներից: Հանձնաժողովի նախագահն է հաղորդակցության գերմանացի հայտնի մասնագետ, ճառագիր, դոկտոր Վազրիկ Բազիլը, անդամներն են՝ Հրաչուհի-Մերի Պողոսյանը (Լոս Անջելեսի Կալիֆոռնիայի համալսարանի պրոֆեսոր, Նորարարության խթանման և հետազոտության կենտրոնի ղեկավար), Միրո Խանզադյանը (ամերիկահայ PR մասնագետ, «GlobalHye & Associates» ընկերության հիմնադիր), Նաիրա Նազարյանը (Հայաստանում Beeline-ի PR ղեկավար), Խաչիկ Գալստյանը (քաղաքական գիտությունների դոկտոր, ԵՊՀ միջազգային հարաբերությունների և ժուռնալիստիկայի ֆակուլտետների դասախոս), Ռուզաննա Իվանյանը (քաղաքական գիտությունների թեկնածու, Սանկտ Պետերբուրգի արդյունաբերական տեխնոլոգիաների և դիզայնի պետական համալսարանի Ժուռնալիստիկայի և մեդիատեխնոլոգիաների ամբիոնի դոցենտ) և Աստղիկ Ավետիսյանը (Հայկական Փի Ար ասոցիացիայի նախագահ, ԵՊՀ ժուռնալիստիկայի ֆակուլտետի «PR և հաղորդակցային տեխնոլոգիաներ» մագիստրոսական ծրագրի ղեկավար, դոցենտ, բ.գ.թ.):
Հայկական PR մրցանակաբաշխություն 2019-ը իրականացվում է Հայկական Փի Ար ասոցիացիայի նախաձեռնությամբ։ Մրցանակաբաշխության գործընկերն է Beeline Հայաստանը, աջակիցներն են՝ ՀԲԸՄ Հայաստանը, «Ռումորս մոնիթորինգ» ընկերությունը, «Արլուպա» ընկերությունը, N Սվիթ ստուդիոն, Հեքիմյան բենդը, «Արմենիա Վայն» ընկերությունը։
2019 թ. մրցանակաբաշխության անվանակարգերն ու հաղթողներն են` «Տարվա մշակութային PR» անվանակարգ` «Ոսկե ծիրան» կինոփառատոն, «Տարվա թվային PR»` ՀՀ արտաքին գործերի նախարարարության հեղինակած «Minecraft» նախագիծ, «Տարվա իմիջային PR»` CONIFA-Արցախ 2019 ֆուտբոլի Եվրոպայի առաջնություն, «Տարվա PR նախաձեռնություն» անվանակարգում հաղթողները երկուսն են` Երևանի 2800-ամյակին նվիրված այգին («Վարդանյան ընտանիք» բարեգործական հիմնադրամ) և սեռով պայմանավորված հղիության ընդհատումների դեմ «Բավական է» արշավը («Doping» գովազդային ընկերություն), «Տարվա ԶԼՄ»` Հանրային ռադիոն («Կոմիտաս 150 տարի/րոպե» նախագիծ), «Տարվա կորպորատիվ PR»` «Երեմյան փրոջեքթս» ընկերությունը, «Տարվա PR իրադարձություն»` Տեղեկատվական տեխնոլոգիաների համաշխարհային համաժողով (WCIT-2019), «Տարվա քաղաքական գործիչ»` Բակո Սահակյան (Արցախի Հանրապետության նախագահ) և Նաիրա Զոհրաբյան (ՀՀ ԱԺ պատգամավոր, «Բարգավաճ Հայաստան» կուսակցություն), «Տարվա հրապարակային գործիչ»` Լարիսա Ալավերդյան (2004-2006 ՀՀ ՄԻՊ, «Ընդդեմ իրավական կամայականության» ՀԿ գործադիր տնօրեն ), «Տարվա պետական կառույց»` ՀՀ առողջապահության նախարարություն, «Տարվա մամուլի քարտուղար»` Աննա Նաղդալյան (ՀՀ Արտաքին գործերի նախարարություն), «Տարվա PR տեխնոլոգիա»` Ararat Challenge («Ավրորա »մարդասիրական նախաձեռնություն), Տարվա կին` ՀՀ նախագահի տիկին Նունե Սարգսյան, «Հայկական բրենդ» անվանակարգ` Շառլ Ազնավուր, «Հայաստանի բարեկամ»` ՀՀ-ում Ճապոնիայի արտակարգ և լիազոր դեսպան Ն.Գ. Ջուն Յամադա
«Հայկական Փի Ար ասոցիացիա» գիտատեղեկատվական հասարակական կազմակերպության առաքելությունն է հանրային կապերի մասին տեղեկատվությունը քննարկել գիտական մակարդակում, կազմակերպել ուսուցողական ծրագրեր, քարոզարշավներ, մշակել PR ռազմավարություն, խորհրդատվությամբ զբաղվել և ֆորումների, սեմինարների և գիտաժողովների միջոցով քննարկել PR ոլորտի հիմնախնդիրներն ու տեսլականը: Մանրամասներին ծանոթացե՛ք www.armpr.org կայքէջից։
«ՎԵՈՆ Արմենիա» ՓԲԸ-ն (Beeline ապրանքանիշ) «ՎԵՈՆ» ընկերությունների խմբի մի մասն է, որն աշխարհի խոշորագույն ինտեգրված օպերատորներից մեկն է: 2007թ.–ի ապրիլից «ՎԵՈՆ Արմենիա» ՓԲԸ–ի 100% –ը (ավելի վաղ «ԱրմենՏել» ՓԲԸ) պատկանում է Veon ընկերությունների խմբին։ «ՎԵՈՆ Արմենիան» տրամադրում է ֆիքսված և բջջային կապի ծառայություններ։–0–