Նոր փոստային նամականիշ՝ նվիրված «Հայաստանի անվտանգության մարմինների կազմավորման 100-ամյակը» թեմային
ԵՐԵՎԱՆ, 24 սեպտեմբերի./ԱՌԿԱ/. 2018 թվականի սեպտեմբերի 24-ին մարվեց և «ՀայՓոստ» ՓԲԸ-ի կողմից շրջանառության մեջ դրվեց մեկ նամականիշ՝ նվիրված «Հայոց պետականություն. Հայաստանի անվտանգության մարմինների կազմավորման 100-ամյակը» թեմային, հաղորդում է «Հայփոստ» ՓԲԸ–ն։
Փոստային նամականիշն ունի 170 ՀՀ դրամ անվանական արժեք: Այն տպագրված է Ֆրանսիայի «Cartor» տպագրատանը՝ 30 000 տպաքանակով: Նամականիշի հեղինակն է «Հայփոստ» ՓԲԸ-ի դիզայներ Դավիթ Դովլաթյանը:
Նամականիշի վրա ի թիվս այլ կառույցների ներկայացված է ՀՀ Ազգային Անվտանգության Ծառայության շենքը ուրվագծային եղանակով: Փոստային նամականիշի աջ հատվածում պատկերված է Երկիր մոլորակը և լուսավորվող ՀՀ Ազգային Անվտանգության Ծառայության զինանշանը՝ խորհրդանշելով ազգային անվտանգության մարմինների կարևորությունը ողջ աշխարհում:
Նամականիշի մարումն իրականացրեցին Հայաստանի Հանրապետության Ազգային Անվտանգության Ծառայության տնօրեն Արթուր Վանեցյանը, Հայաստանի Հանրապետության տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը, Հայաստանի Հանրապետության Ազգային Անվտանգության Ծառայության գնդապետ Պետրոս Պետրոսյանը, «ՀայՓոստ Թրասթ Մենեջմենթի» գլխավոր տնօրեն Խուան Պաբլո Գեչիջյանը, Հայաստանի ֆիլատելիստների միության նախագահ Հովիկ Մուսայելյանը:
Նամականիշը թողարկվել է 2018 թ.–ի սեպտեմբերի 24–ին, դիզայնի հեղինակը Դավիթ Դովլաթյանն է, չափսերը`40,0 x 30,0 մմ։–0–